Live Updates

عمران خان سے متعلق پھیلائی جانیوالی افواہوں میں کوئی صداقت نہیں، سپرنٹنڈنٹ اڈیالہ جیل کی وضاحت

سابق وزیراعظم کے ساتھ جیل میں کوئی امتیازی سلوک رواں نہیں رکھا جاتا، جیل انتظامیہ بانی پی ٹی آئی کی سکیورٹی اور صحت سے متعلق بھرپور فرائض انجام دے رہی ہے؛ اعلامیہ

ساجد علی منگل 15 جولائی 2025 16:36

عمران خان سے متعلق پھیلائی جانیوالی افواہوں میں کوئی صداقت نہیں، سپرنٹنڈنٹ ..

راولپنڈی ( اُردو پوائنٹ اخبارتازہ ترین۔ 15 جولائی 2025ء ) راولپنڈی کی اڈیالہ جیل کے سپرنٹنڈنٹ نے پاکستان تحریک انصاف کے پیٹرن انچیف عمران خان کو میسر سہولیات سے متعلق وضاحت جاری کردی۔ پریس ریلیز کے مطابق عمران خان کو جیل میں قانون کے تحت بی کلاس سہولیات میسر ہیں، ان کو خوراک، مطالعہ کتب، اخبارات، ورزش اور واک کی سہولت دی گئی ہے، انہیں 7 سیلز پر مشتمل کمپلیکس میں رکھا گیا ہے جہاں چہل قدمی کیلئے کھلا صحن بھی موجود ہے۔

سپرنٹنڈنٹ اڈیالہ جیل کا کہنا ہے کہ عمران خان کے پاس ایکسرسائز کیلیے سائیکل اور ایل ای ڈی بھی میسر ہے، ان کو دی گئی سہولیات دیگر بی کلاس کے اسیران کو میسر نہیں، بانی پی ٹی آئی کو ذاتی انتخاب کے مطابق اخبارات اور کتب کی سہولت میسر ہے، عمران خان کو اپنا کھانا تیار کروانے کیلئے باقاعدہ قیدی باورچی فراہم کیا گیا ہے جو ان کی خواہش کے مطابق ناشتہ، دوپہر اور شام کا کھانا تیار کرتا ہے۔

(جاری ہے)

پریس ریلیز میں بتایا گیا ہے کہ عمران خان نے جیل سے اب تک 413 بار ٹوئٹر سے ٹوئٹ کروایا، انہوں نے ٹوئٹ سے پارٹی ورکرز کو سیاسی سرگرمیوں پر ہدایات دی ہیں، وہ 2024ء سے اب تک 10 بین الاقوامی میڈیا چینلز سے بھی اپنے خیالات کا اظہار کر چکے ہیں، بانی پی ٹی آئی جیل میں سماعتوں کے دوران صحافیوں سے براہ راست مخاطب بھی رہے، ان سے گزشتہ 3 ماہ میں 66 سیاسی لیڈرز، فیملی ممبرز اور وکلا نے ملاقاتیں کیں۔

اڈیالہ جیل سپرنٹنڈنٹ نے کہا کہ جیل میں متعین ڈاکٹرز دن میں تین بار عمران خان کا طبی معائنہ کرتے ہیں، ان کو گزشتہ 2 ہفتے میں کسی بھی قسم کی بیماری یا عارضہ رپورٹ نہیں ہوا، جیل انتظامیہ بانی پی ٹی آئی کی سکیورٹی اور صحت سے متعلق بھرپور فرائض انجام دے رہی ہے، عمران خان سے متعلق سوشل میڈیا پر پھیلائی جانی والی افواہوں میں کوئی صداقت نہیں، ان کے ساتھ جیل میں کوئی امتیازی سلوک رواں نہیں رکھا جاتا۔