مودی انتظامیہ کی سنگدلی، جنسی ہراسانی کی شکایت نظر انداز کیے جانے پرمظلوم طالبہ کی خودسوزی

منگل 15 جولائی 2025 22:38

نئی دہلی (اُردو پوائنٹ اخبارتازہ ترین - آن لائن۔ 15 جولائی2025ء) بھارت کی ریاست اڑیسہ میں ایک طالبہ نے جنسی ہراسانی کی شکایت نظر انداز کیے جانے پر خود کو آگ لگا لی، جس سے اس کی حالت انتہائی نازک ہو گئی ہے۔ ہسپتال انتظامیہ کے مطابق طالبہ کے جسم کا 90 فیصد سے زائد حصہ جل چکا ہے۔ اس واقعے کے دوران چند اور طلبہ بھی آگ بجھانے کی کوشش میں زخمی ہوئے۔

طالبہ کا کہنا ہے کہ ایک فیکلٹی ممبر نے اس سے ناجائز مطالبات کیے اور انکار پر اس کے تعلیمی مستقبل کو تباہ کرنے کی دھمکیاں دیں۔ مزید یہ کہ اسے کلاسوں میں شرکت سے بھی روکا جا رہا تھا۔ اس نے مسلسل جنسی ہراسانی کی شکایت کی اور دھرنا بھی دیا، مگر نہ تو کالج انتظامیہ اور نہ ہی پولیس نے کوئی کارروائی کی۔ مودی حکومت کے دور میں بھارت خواتین کے لیے سب سے زیادہ غیر محفوظ ملک قرار پایا ہے، جہاں تعلیمی اداروں میں طلباء کی حفاظت یقینی بنانے میں سنگین ناکامیاں دیکھنے میں آ رہی ہیں۔

(جاری ہے)

جنسی ہراسانی کے واقعات میں مسلسل اضافہ اور تعلیمی اداروں میں تحفظ کی کمی نے حکومت پر سخت تنقید کے سوالات کھڑے کر دیے ہیں۔ یہ واقعہ مودی سرکار کی ناقص پالیسیوں اور انتظامی غفلت کا منہ بولتا ثبوت ہے، جس سے ظاہر ہوتا ہے کہ بھارت میں خواتین اور نوجوانوں کی حفاظت کے حوالے سے ابھی بہت کام کرنے کی ضرورت ہے۔