چیئرمین سینیٹ یوسف رضا گیلانی سے بین الپارلیمانی سپیکرز کانفرنس کے سیکرٹری جنرل اک ناتھ دھکل کی ملاقات

منگل 15 جولائی 2025 22:55

اسلام آباد(اُردو پوائنٹ اخبارتازہ ترین - آن لائن۔ 15 جولائی2025ء)چیئرمین سینیٹ سید یوسف رضا گیلانی سے بین الپارلیمانی سپیکرز کانفرنس کے سیکرٹری جنرل اک ناتھ دھکل کی پارلیمنٹ ہاؤس اسلام آباد میں ملاقات ہوئی۔چیئرمین سینیٹ سید یوسف رضا گیلانی آئی ایس سی کے بانی چیئرمین بھی ہیں۔ملاقات میں آئی ایس سی کے سیکرٹری جنرل نے چیئرمین سینیٹ سے نومبر میں پاکستان میں منعقد ہونے والی مجوزہ کانفرنس پر بھی تبادلہ خیال کیا۔

چیئرمین سینیٹ وبانی چیئرمین آئی ایس سی نے سیکرٹری جنرل آئی ایس سی کے دورے کو انتہائی اہم قرار دیااور کہا کہ آئی ایس سی امن و ترقی کے فروغ کے لیے کام کرنے کا ایک اہم فورم ثابت ہوگا۔سید یوسف رضا گیلانی نے کہا کہ تنازعات و دیگر عالمی چیلنجز نے تمام اقوام کے لیے مشکلات پیدا کی ہیں۔

(جاری ہے)

مسائل کا مل کر مشترکہ حکمت عملی کے ذریعے حل نکالنا وقت کی اہم ضرورت ہے۔

آئی ایس سی کے سیکرٹری جنرل نے تمام فورم کے اراکین کی جانب سے سید یوسف رضا گیلانی کی قیادت پر بھرپور اعتماد کا اظہار کیااورکہا کہ سید یوسف رضا گیلانی عالمی مقبولیت رکھتے ہیں آئی ایس سی ان کی قیادت میں موثر انداز میں کام کرے گا۔سیکرٹری جنرل آئی ایس سی نے چیئرمین سینیٹ و بانی چیئرمین آئی ایس سی کو مستقبل کے لائحہ عمل کے بارے میں بھی آگاہ کیااور بتایا کہ آئی ایس سی نے آئی پی یو مبصر کی حیثیت سے شمولیت کے لیے درخواست دی ہے۔اقوام متحدہ کے ساتھ بھی رابطہ کاری کو فروغ دیں گے۔