چیف آف آرمی سٹاف فیلڈ مارشل سید عاصم منیرسے انڈونیشیا کے وزیر دفاع کی وفد کے ہمراہ ملاقات

منگل 15 جولائی 2025 23:43

راولپنڈی (اُردو پوائنٹ اخبارتازہ ترین - اے پی پی۔ 15 جولائی2025ء) چیف آف آرمی سٹاف فیلڈ مارشل سید عاصم منیرسے انڈونیشیا کے وزیر دفاع لیفٹیننٹ جنرل (ر)سیافری سمسودین نے وفدکے ہمراہ منگل کو جنرل ہیڈ کوارٹرز میں ملاقات کی۔آئی ایس پی آر سے جاری بیان کے مطابق ملاقات کے دوران فریقین نے دوطرفہ دفاعی تعاون، علاقائی سلامتی کی صورتحال اور فوجی تعلقات کو مزید مضبوط بنانے کے طریقوں پر تبادلہ خیال کیا۔

(جاری ہے)

ملاقات میں دونوں ممالک کے درمیان دیرینہ دوستانہ اور تعاون پر مبنی تعلقات کی ضرورت پر زور دیا گیا۔ فیلڈ مارشل نے خطے میں امن و استحکام کو برقرار رکھنے کے لیے باہمی تعاون کی اہمیت کو اجاگر کیا۔انڈونیشیا کے وزیر دفاع نے دہشت گردی کے خلاف جنگ میں پاک فوج کے کردار کو سراہا اور پاکستان کے ساتھ دفاعی تعلقات کو بڑھانے کے لئے انڈونیشیا کے عزم کا اعادہ کیا۔ملاقات میں انڈونیشیا کے وزیر دفاع کے ہمراہ مختلف سروسز اور انٹیلی جنس ایجنسیوں کے نمائندے بھی شریک تھے۔