انڈونیشی وزیر دفاع کا دورہ جی ایچ کیو، فیلڈ مارشل عاصم منیر سے ملاقات،دو طرفہ دفاعی تعاون پر تبادلہ خیال

منگل 15 جولائی 2025 19:25

راولپنڈی (اُردو پوائنٹ اخبارتازہ ترین - این این آئی۔ 15 جولائی2025ء)انڈونیشیا کے وزیر دفاع نے وفد کے ہمراہ منگل کو جی ایچ کیو کا دورہ کیا اور فیلڈ مارشل عاصم منیر سے ملاقات کی۔ مسلح افواج کے شعبہ تعلقات عامہ (آئی ایس پی آر) کے مطابق انڈونیشیا کے وفد میں مختلف سروسز اور انٹیلی جنس ایجنسیوں کے نمائندے شامل تھے۔ انڈونیشیا کے وفد نے آرمی چیف فیلڈ مارشل عاصم منیر سے ملاقات کی۔

اس موقع پر دونوں ممالک کے درمیان دو طرفہ دفاعی تعاون پر تبادلہ خیال کیا گیا۔

(جاری ہے)

ملاقات میں علاقائی سلامتی کی صورتحال اور عسکری تعلقات کو مزید مضبوط بنانے کے امکانات پر بھی بات چیت کی گئی۔ آئی ایس پی آر کے مطابق ملاقات میں پاکستان اور انڈونیشیا کے درمیان دیرینہ دوستی اور تعاون پر زور دیا گیا۔اس موقع پر فیلڈ مارشل عاصم منیر نے خطے میں امن و استحکام کیلئے باہمی تعاون کی اہمیت پر روشنی ڈالی۔ آئی ایس پی آر کے مطابق انڈونیشیا کے وزیر دفاع نے دہشتگردی کے خلاف جنگ میں پاک فوج کے کردار کو سراہا اور پاکستان کے ساتھ دفاعی تعلقات کو مزید فروغ دینے کے عزم کا اعادہ کیا۔