وزیراعلیٰ سندھ کا حیدرآباد کے بارش سے متاثرہ علاقوں کا دورہ، فوری ریلیف فراہم کرنے کی ہدایت کی

حیدرآباد (اُردو پوائنٹ اخبارتازہ ترین - اے پی پی۔ 17 جولائی2025ء) وزیراعلیٰ سندھ سید مراد علی شاہ نے حیدرآباد کے بارش سے متاثرہ علاقوں کا دورہ کیا اور شہریوں کو فوری ریلیف فراہم کرنے کے لیے انتظامیہ کو ہدایات جاری کیں۔ اس موقع پر صوبائی وزراء شرجیل انعام میمن، جام خان شورو، میئر حیدرآباد کاشف شورو، کمشنر حیدرآباد بلال میمن اور ڈپٹی کمشنر زین العابدین میمن بھی ان کے ہمراہ تھے۔

وزیراعلیٰ نے سول لائنز، ٹھنڈی سڑک، آٹو بھان روڈ پمپنگ سٹیشن، ریلوے انڈرپاس، فتح چوک، مکی شاہ روڈ، قاضی قیوم روڈ اور قاسم آباد کے نشیبی علاقوں کادورہ کیا اور بارش کے پانی کی فوری نکاسی اور صفائی کے کاموں میں تیزی لانے کی ہدایت کی۔ ڈپٹی کمشنر زین العابدین میمن نے وزیراعلیٰ کو بریفنگ میں بتایا کہ 14 جولائی کو حیدرآباد میں ایک گھنٹے کے دوران 107 ملی میٹر بارش ریکارڈ کی گئی، لطیف آباد میں 91 ملی میٹر اور قاسم آباد میں 55 ملی میٹر بارش ہوئی۔

(جاری ہے)

24 گھنٹوں میں شہر کے 90 فیصد علاقوں سے پانی نکال دیا گیا۔ وزیراعلیٰ نے کہا کہ حیدرآباد کی نکاسی مکمل طور پر پمپنگ سسٹم پر منحصر ہے کیونکہ یہاں گریوٹی نکاسی ممکن نہیں، اس لئے حیسکو کو بارش کے دوران بجلی کی بلا تعطل فراہمی یقینی بنانے کی ہدایت دی کی گئی ہے۔ انہوں نے آٹو بھان روڈ، عبدالستار ایدھی روڈ اور دیگر ترقیاتی منصوبوں کا بھی جائزہ لیا۔

انہوں نے عبدالستار ایدھی فلائی اوور کی جلد تکمیل اور تجاوزات کے خاتمے کے احکامات جاری کئے۔ انہوں نے ورکس ڈیپارٹمنٹ کو ہدایت کی کہ پنیاری کینال کے دونوں اطراف سڑکیں تعمیر کی جائیں جن پر 2200 ملین روپے لاگت آئے گی۔ وزیراعلیٰ نے پریس کانفرنس سے خطاب کرتے ہوئے کہا کہ وہ 2005 میں بھی کشتی میں بیٹھ کر لطیف آباد کا دورہ کر چکے ہیں اور شہر کے مسائل سے بخوبی آگاہ ہیں۔

انہوں نے کہا کہ آٹو بھان روڈ پر 8منزلہ عمارتوں کی تجاوزات کو ہٹا دیا گیا ہے اور دیگر علاقوں میں بھی کارروائی جاری ہے۔ مخدوش عمارتوں کو خالی کرانے کی ہدایات بھی جاری کر دی گئی ہیں۔ انہوں نے کہا کہ وسائل محدود ضرور ہیں لیکن حیدرآباد حکومت سندھ کی اولین ترجیح ہے اور عوامی خدمت میں کوئی کسر نہیں چھوڑی جائے گی۔ تمام ترقیاتی منصوبے شفاف انداز اور بروقت مکمل کئے جائیں گے۔

وزیراعلیٰ نے مزید بتایا کہ نیاز سٹیڈیم کی بحالی کے لئے پی سی بی چیئرمین محسن نقوی سے بات چیت ہو چکی ہے اور آئندہ سال پی ایس ایل کے میچز حیدرآباد میں ہوں گے۔ ستمبر میں ایشین چیمپئن شپ کے میچز کراچی اور حیدرآباد میں ہوں گے جن میں 6 ممالک کی ٹیمیں شریک ہوں گی جبکہ ڈی پارک کا افتتاح اگست میں کیا جائے گا۔ وزیراعلیٰ نے کہا کہ حیدرآباد سندھ کا دوسرا بڑا شہر ہے اور پیپلزپارٹی کی حکومت کی اولین ترجیح رہے گا۔