اسرائیل اورشام کی سرحد پر موجو”د دروز“ فرقے سے تعلق رکھنے والے ہزاروں افراد واپس چلے گئے

دمشق(اردوپوائنٹ اخبارتازہ ترین-انٹرنیشنل پریس ایجنسی۔17 جولائی ۔2025 )اسرائیل اور شام کی سرحد پر موجو”د دروز“ فرقے سے تعلق رکھنے والے ہزاروں افراد واپس چلے گئے ہیں جبکہ شام نے دمشق پر اسرائیل کی بمباری پرشدید ردعمل کا اظہار کیا ہے اسرائیلی جریدے کے مطابق اسرائیلی علاقے میں رہائش پذیر”دروز“قبیلے کے لوگو ں کی جانب سے شام میں داخل ہونے کی کوششیں اب رک چکی ہیں.

رپورٹ میں کہا گیا ہے کہ کچھ اسرائیلی دروز تا حال شام کے اندر موجود ہیں اور انہیں واپس لانے کی کوششیں جاری ہیں اس سے قبل اسرائیلی وزیر اعظم نیتن یاہو نے دروز سے اپیل کی تھی کہ وہ شام کی طرف سرحد عبور نہ کریں کیونکہ فوج نے مجدل شمس کے علاقے میں باڑ عبور کرنے کے کچھ واقعات سامنے آئے تھے.

(جاری ہے)

نیتن یاہو نے اپنے دفتر سے جاری بیان میں دروز سے مخاطب ہو کر کہاکہ آپ اسرائیل کے شہری ہیں، سرحد عبور نہ کریں، آپ اپنی جان خطرے میں ڈال رہے ہیں آپ کو قتل کیا جا سکتا ہے یا اغوا کیا جا سکتا ہے اسرائیلی وزیر اعظم نے کہا”سویدا “ اور جنوب مغربی شام میں صورتِ حال نہایت خطرناک ہے انہوں نے کہاکہ آپ اسرائیلی فوج کی کوششوں میں رکاوٹ ڈال رہے ہیں اس لیے میں آپ سے کہتا ہوں اپنے گھروں کو لوٹ جائیں اور فوج کو اپنا کام کرنے دیں.

دوسری جانب شامی صدر احمد الشرع نے اپنے خطاب میں اسرائیل پر "شام کے اندر فتنہ پھیلانے" کا الزام عائد کیا اور کہا کہ اسرائیلی اقدامات نے ”سویدا“صوبے میں صورتِ حال کو مزید بگاڑ دیا ہے الشرع نے زور دیا کہ دروز شام کے سماجی تانے بانے کا ایک بنیادی حصہ ہیں. انہوں نے کہا کہ میں اپنی بات خاص طور پر اپنے دروز بھائیوں سے کہتا ہوں، جو اس وطن کے اصل حصے میں شامل ہیں شام کبھی بھی تقسیم یا فتنہ پردازی کی سرزمین نہیں بنے گا ہم آپ کو یقین دلاتے ہیں کہ آپ کے حقوق اور آزادی کا تحفظ ہماری اولین ترجیح ہے، اور ہم کسی بھی ایسے منصوبے کو مسترد کرتے ہیں جس کا مقصد آپ کو کسی بیرونی فریق کے ساتھ گھسیٹنا یا ہمارے درمیان تقسیم پیدا کرنا ہو ہم سب اس زمین کے شراکت دار ہیں، اور ہم کسی بھی فریق کو اس خوب صورت تصویر کو مسخ کرنے کی اجازت نہیں دیں گے، جو شام کی پہچان اور تنوع کی عکاس ہے.

واضح رہے کہ اتوار کے روزشام کے سرحدی صوبے سویدا میں دروز مسلح افراد اور بدو جنگجوﺅں کے درمیان جھڑپیں شروع ہوئیں جن میں متعدد افراد ہلاک ہو گئے تھے جس کے بعد سرکاری افواج نے مداخلت کرتے ہوئے فریقین کے درمیان لڑائی روکنے کی کوشش کی اسرائیل نے بھی اس تنازع میں مداخلت کی اور دمشق کے قریب اور جنوبی شام میں کئی فضائی حملے کیے اسرائیل کا موقف ہے کہ وہ ان کارروائیوں کے ذریعے دروز کا تحفظ کر رہا ہے شامی حکام نے سویداءمیں دروز گروپوں کے ساتھ جنگ بندی کے ایک معاہدے تک پہنچنے کا اعلان کیا ہے جبکہ اسرائیل کی جانب سے دمشق میں صدارتی محل سمیت اہم مقامات پر بمباری پر ردعمل کا اظہار کرتے ہوئے اسے کھلی جنگ قراردیا.