کشمیری عوام بھارت سے خون کے ہر قطرے کا حساب لیں گے،پاکستان نے دنیا کے ہر فورم پر کشمیریوں کا مقدمہ لڑا،غلام محمد صفی

لاہور (اُردو پوائنٹ اخبارتازہ ترین - اے پی پی۔ 17 جولائی2025ء) کل جماعتی حریت کانفرنس جموں و کشمیر کے کنوینئر غلام محمد صفی نے کہا ہے کہ کشمیری عوام بھارت سے خون کے ہر قطرے کا حساب لیں گے،پاکستان کشمیریوں کی سیاسی، سفارتی اور اخلاقی حمایت جاری رکھے گا ،پاکستان کشمیریوں کے دل کی دھڑکن ہے،اقوامِ متحدہ اور انسانی حقوق کی تنظیمیں کشمیری عوام کو حق د لانے کیلئے بھارت پر دبائو ڈالیں۔

ان خیالات کا اظہار انہوں نے جمعرات کے روز یہاں لاہور پریس کلب میں پریس کانفرنس کرتے ہوئے کیا۔اس موقع پرحریت کانفرنس کے سیکرٹری جنرل ایڈوکیٹ پرویز احمد شاہ ،سابق سیکرٹری جنر ل شیخ عبد المتین ، حریت رہنما انجینئر مشتاق محمود اور شیخ عبدالماجد سمیت دیگر کارکنان بھی موجود تھے۔

(جاری ہے)

کل جماعتی حریت کانفرنس کے کنوینئر غلام محمد صفی نے کہا کہ 19 جولائی1947 وہ دن ہے جب سر زمینِ کشمیر کے فرزندانِ حریت نے آبی گزر سرینگر میں ایک تاریخ ساز فیصلہ کیا،اس دن کو منا نے کا مقصد ہمیں نہ صرف اپنے ماضی کی یاد دہانی کراتا ہے بلکہ ہمیں اپنے آج کے فرض اور آنے والے کل کی ذمہ داریوں کا بھی شعور بخشتا ہے۔

انہوں نے کہا کہ آج ہم پوری دنیا کو یاد دلانا چاہتے ہیں کہ کشمیر کوئی سرحدی تنازعہ نہیں بلکہ انسانوں کی جدوجہد ہے جو اپنے تشخص، آزادی اور اپنی مرضی کی زندگی جینے کیلئے غاصب بھارت سے نبرد آزما ہیں۔انہوں نے مزید کہا کہ پاکستان کشمیر کی اخلاقی، سیاسی اور سفارتی حمایت جاری رکھے گا،ہم آج بھی وہی نعرہ دہراتے ہیں جو ہمارے بزرگوں نے آبی گزر کے میدان میں بلند کیا تھا۔

''کشمیر بنے گا پاکستان''۔غلام محمد صفی نے کہاکہ ہمارا اس بات پر یقین ہے کہ ایک دن فتح کشمیریوں کے قدم چومے گی اور وہ دن ضرور آئے گا جب سری نگر کی فضا ئوں میں پاکستان کا پرچم لہرائے گا۔انہوں نے کہا کہ ہم دنیا کی تمام آزادی پسند اقوام،انسانی حقوق کی تنظیموں اور اقوامِ متحدہ سے مطالبہ کرتے ہیں کہ وہ اس تاریخی حقیقت کو تسلیم کریں،کشمیری عوام کو ان کا حق دیں اور بھارت پر دبائو ڈالیں کہ وہ اپنی جارحانہ پالیسیوں کو ترک کرے اور کشمیریوں سے کئے گئے وعدے کو پورا کرے۔

حریت کانفرنس کے سیکرٹری جنرل ایڈوکیٹ پرویز احمد شاہ نے کہا کہ پاکستان نے ہمیشہ کشمیر یوں کا مقدمہ ہر فورم پر بہترین انداز میں لڑا ہے،کشمیریوںکی آزادی کے حوالے سے تمام قربانیوں کو بھلانا ممکن نہیں،ہم اپنے ان شہدا کو سلام پیش کرتے ہیں جنہوں نے اپنی جانوں کے نذرانے پیش کرکے آزادی کی تحریک کو پروان چڑھایا،ہم ان کے مشن سے ایک انچ بھی پیچھے نہیں ہٹیں گے۔

انہوں نے کہا کہ 19جولائی بروز ہفتہ کو کشمیریوں سے اظہار یکجہتی کیلئے مسجد شہدا سے پنچاب اسمبلی ہال تک ایک ریلی نکالی جائے گی جس میں بھارتی جارحیت کیخلاف اقوامِ عالم تک کشمیریوں کی آواز پہنچائیں گے۔انہوں نے کہاکہ حقیقت یہ ہے کہ پاکستان نے عالمی سطح پر اس مسئلے کو بھرپور سفارتی انداز میں اٹھایا ہے،پاکستان نے حالیہ جنگ میں بھارت کو شکست دے کر ثابت کیا ہے کہ مسئلہ کشمیر کا حل پاکستان کی اولین ترجیح ہے، انہوں نے افواج پاکستان کو بھر پور خراج تحسین پیش کرتے ہوئے کہا کہ پاک افواج نے بھارت کو شکست دے کر پاکستان کا پوری دنیا میں امیج بلند کیا اور یہ ثابت کیا کہ پاک فوج دنیا کی بہترین فوج ہے.