پی ٹی آئی کی سابقہ حکومت پی آئی ایکی تباہی اور دیگر قومی نقصانات کی ذمہ دار ہے،خواجہ محمد آصف

جمعرات 17 جولائی 2025 19:01

اسلام آباد(اُردو پوائنٹ اخبارتازہ ترین - این این آئی۔ 17 جولائی2025ء)وفاقی وزیر دفاع خواجہ محمدآصف نے کہا ہے کہ پاکستان تحریک انصاف (پی ٹی آئی)ریاست کے خلاف مجرمانہ اقدامات اور پاکستان انٹرنیشنل ایئر لائنز (پی آئی ای) کو تباہ کرنے کی ذمہ دارہے۔ نجی ٹی وی سے گفتگو کرتے ہوئے وفاقی وزیر نے کہا کہ یو کے ایئرسیفٹی فہرست سے پاکستان کا نام نکالنا وزیراعظم شہباز شریف کی قیادت میں موجودہ حکومت کی ایک اہم کامیابی ہے۔

(جاری ہے)

انہوں نے مزید کہا کہ پی ٹی آئی کے دور حکومت کے دوران اس وقت کے وزیر ہوا بازی غلام سرور خان کے ایک متنازعہ بیان کے بعد2020 میں پی آئی اے پر لگائی گئی پابندی سے ملک کو اربوں روپے کا نقصان ہوا اور قومی ایئرلائن کی ساکھ کو شدید نقصان پہنچا۔ انہوں نے کہا کہ حکومت ان وجوہات کی تحقیقات کرے گی جن کی وجہ سے پابندی لگائی گئی اور اس کے مطابق ادارہ جاتی کارروائی کی جائے گی۔ خواجہ آصف نے کہا کہ پابندی کا خاتمہ پاکستان کے سول ایوی ایشن کے شعبے میں خاص طور پر برطانیہ اور یورپی یونین سے بڑھتے ہوئے بین الاقوامی اعتماد کی عکاسی کرتا ہے۔