پشاور،پی ٹی آئی ارکان اسمبلی کو آزاد قرار دینے کیخلاف درخواست پر الیکشن کمیشن کو نوٹس

الیکشن کمیشن نے سپریم کورٹ فیصلے کی غلط تشریح کی، وکلا کے پشاور ہائی کورٹ میں دلائل

جمعہ 18 جولائی 2025 13:20

پشاور(اُردو پوائنٹ اخبارتازہ ترین - این این آئی۔ 18 جولائی2025ء)پی ٹی آئی کے ارکان اسمبلی کو آزاد قرار دینے کے خلاف درخواست پر الیکشن کمیشن سمیت دیگر فریقین کو نوٹس جاری کردیا گیا۔جمعہ کووزیراعلیٰ خیبر پختونخوا علی امین گنڈاپور کی الیکشن کمیشن کی جانب سے پاکستان تحریک انصاف کے ارکان کو آزاد قرار دینے کے خلاف دائر درخواست پر سماعت پشاور ہائی کورٹ کے جسٹس صاحبزادہ اسد اللہ اور جسٹس فرخ جمشید پر مشتمل 2 رکنی بینچ نے کی۔

دوران سماعت درخواست گزار کے وکیل بشیر خان وزیر ایڈووکیٹ نے مؤقف اختیار کیا کہ الیکشن کمیشن نے پی ٹی آئی ممبران کو آزاد قرار دیا ہے۔ وزیراعلیٰ علی امین گنڈاپور سمیت دیگر ارکان نے الیکشن پی ٹی آئی کی ٹکٹ پر لڑا اور کسی اور پارٹی میں شامل نہیں ہوئے۔

(جاری ہے)

ایڈووکیٹ جنرل شاہ فیصل اتمانخیل نے عدالت میں مؤقف اختیار کیا کہ سپریم کورٹ فیصلے کے بعد پی ٹی آئی سے انتخابی نشان لیا گیا اور پی ٹی آئی امیدواروں نے مختلف نشانات سے الیکشن میں حصہ لیا۔

سپریم کورٹ نے فیصلے میں پی ٹی آئی کو غیر سیاسی جماعت قرار نہیں دیا، الیکشن کمیشن نے سپریم کورٹ فیصلے کی غلط تشریح کی۔ الیکشن ایکٹ 2017 کے مطابق انتخابی نشان لینے سے پارٹی ختم نہیں ہوتی۔انہوں نے اپنے دلائل میں کہا کہ الیکشن رولز 2017 میں انتخابی نشان لینے سے سیاسی جماعت ختم ہوتی ہے، الیکشن کمیشن نے اس کا سہارا لیا اور پی ٹی آئی ممبران کو آزاد قرار دیا۔

ایکٹ کے ساتھ رولز متصادم ہو، تو پھر ایکٹ کو ترجیح دی جائے گی۔ پی ٹی آئی امیدواروں نے الیکشن میں خیبرپختونخوا میں سب سے زیادہ نشستیں جیتی ہیں۔ مخصوص نشستوں میں پی ٹی آئی کو نظرانداز کیا گیا اور دوسری جماعتوں کو نشستیں دی گئیں۔جسٹس صاحبزادہ اسد اللہ خان نے ریمارکس دئیے کہ ہم اس کیس میں فریقین کو نوٹس جاری کرتے ہیں۔ بعد ازاں عدالت نے الیکشن کمیشن اور دیگر فریقین کو نوٹس جاری کرتے ہوئے سماعت 21 جولائی تک ملتوی کردی۔