جموں و کشمیر کی بھارتی قبضے سے آزادی ،پاکستان کیساتھ الحاق تک جدوجہد جاری رکھیں گے،کشمیریوں کاعزم

ہفتہ 19 جولائی 2025 15:59

سرینگر(اُردو پوائنٹ اخبارتازہ ترین - این این آئی۔ 19 جولائی2025ء)کنٹرول لائن کے دونوں جانب اور دنیا بھر میں مقیم کشمیریوںنے ہفتہ کو’’یوم الحاق پاکستان‘‘اس عزم کی تجدید کے ساتھ منایاہے کہ کہ وہ جموں و کشمیر کی بھارتی قبضے سے آزادی اورپاکستان کے ساتھ الحاق تک اپنی جدوجہد جاری رکھیں گے۔کشمیریوں کے حقیقی نمائندوں نے 19جولائی 1947کو سرینگر کے علاقے آبی گزر میں سردار محمد ابراہیم خان کی رہائش گاہ پر آل جموں و کشمیر مسلم کانفرنس کے تاریخی اجلاس میں متفقہ طور پر پاکستان کے ساتھ جموں وکشمیر کے الحاق کی قرارداد منظور کی تھی،یہ قرارداد جموں و کشمیر اور پاکستان کے درمیان گہرے مذہبی، جغرافیائی، ثقافتی اور تہذیبی رشتوں کی عکاس ہے۔

کشمیر میڈیا سروس کے مطابق کل جماعتی حریت کانفرنس کے ترجمان ایڈووکیٹ عبدالرشید منہاس نے سرینگر میں جاری ایک بیان میں کہاکہ بھارت کی چیرہ دستیوں کے باوجود کشمیری عوام کا لحاق پاکستان کا خواب زندہ و جاوید ہے ، وہ اپنے 19جولائی1947 کے عہد پر قائم و دائم ہے۔

(جاری ہے)

انہوں نے کہا کہ عظیم آزادی پسند قائد سید علی گیلانی شہید کا نعرہ ’’ہم پاکستانی ہیں ، پاکستان ہمارا ہے‘‘ کشمیریوں کی پہچان بن چکا ہے ، بھارت کا بے انتہا جبر وستم انکے دلوں سے پاکستان کی محبت نکال نہیں سکا اور وہ اس کے تسلط سے آزادی اور پاکستان کے ساتھ الحاق کی جدوجہد عزم و ہمت سے جاری رکھے ہوئے ہیں۔