پاکستان رینجرزسندھ کی جانب سے ڈکیتی اور اسٹریٹ کرائم کی روک تھام کیلئے آپریشن کا سلسلہ جاری

ہفتہ 19 جولائی 2025 17:47

کراچی (اُردو پوائنٹ اخبارتازہ ترین - اے پی پی۔ 19 جولائی2025ء) پاکستان رینجرز(سندھ)کی جانب سے ڈکیتی اور اسٹریٹ کرائم کی روک تھام کے لیے آپریشن کا سلسلہ جاری ،رینجرزسندھ اور پولیس نے انٹیلی جنس معلومات کی بنیاد پر مشترکہ کارروائی کرتے ہوئے کراچی کے علاقے منزل پمپ اور صاحب داد گوٹھ سے دوران اسنیپ چیکنگ ٹارگٹ کلنگ، بھتہ خوری، لینڈ گریبنگ، ڈکیتی اور اسٹریٹ کرائم کی متعدد وارداتوں میں ملوث5 ملزمان محمد ہمایوں خان، حمزہ، ذیشان عرف شانی کباڑیہ، انس عرف انو اور سمیر کو گرفتار کر کے ان کے قبضے سے 3عدد موبائل فونز،ایک عدد 30 بور پسٹل بمعہ ایمونیشن، ایک عدد 32بور ریوالور، ایک عدد 9ایم ایم پسٹل بمعہ ایمونیشن، 2عدد موٹر سائیکلیں اور نقدی برآمد کر لی ۔

ہفتہ کو ترجمان سندھ رینجرز کے مطابق ابتدائی تفتیش میں ملزمان کراچی کے مختلف علاقوں میں ڈکیتی اور اسٹریٹ کرائم کی متعدد وارداتوں میں ملوث ہیں۔

(جاری ہے)

ملزمان نے یکم جولائی 2025کو سعود آباد سی ایریا میں ایک ڈکیتی کی واردات میں ملوث ہونے کا اعتراف کیا ہے، واردات کی سی سی ٹی وی فوٹیج میں ملزمان کو واضح طور پر دیکھا جا سکتا ہے۔ ملزمان عادی مجرم ہیں اور ان کے خلاف تھانہ سعود آباد اور ماڈل کالونی میں ایف آئی آرز درج ہیں۔

ملزمان کی گرفتاری کے لیے 26جون 2025کو محمدی کالونی میں چھاپہ مار کارروائی عمل میں لائی گئی تھی لیکن ملزمان موقع سے فرار ہونے میں کامیاب ہو گئے تھے جبکہ گرفتار ملزمان کی نشاندہی پر رینجرزسندھ نے ملیر کے علاقے کھوکھرا پار میں کارروائی کرتے ہوئے ملزم انس عرف انو کو گرفتار کر کے ڈکیتیوں میں استعمال ہونے والا اسلحہ بھی برآمد کرلیا۔ گرفتار ملزم درج بالا ملزمان کا ساتھی ہے اور ملزم کے خلاف بھی ایف آئی آر درج ہے۔

گرفتار ملزمان کوبمعہ اسلحہ و ایمونیشن اور مسروقہ سا مان مز ید قانونی کارروائی کے لیے پولیس کے حوالے کردیا گیا ہے۔رینجرزنے عوام سے اپیل کی ہے کہ جرائم اور اسمگلنگ کے خاتمے کے لیے ایسے عناصر کے بارے میں اطلاع فوری طور پر قریبی رینجرز چیک پوسٹ، رینجرز ہیلپ لائن 1101 یا رینجرز مددگار واٹس ایپ نمبر 03479001111 پر کال یا ایس ایم ایس کے ذریعے دیں۔ اطلاع دینے والے کا نام صیغہ راز میں رکھا جائے گا۔