Live Updates

ناراض پی ٹی آئی ارکان کا سینیٹ الیکشن میں کاغذات نامزدگی واپس نہ لینے کا اعلان

پی ٹی آئی کے 25 سے 30 ایم پی ایز رابطے میں ہیں، الیکشن میں سرپرائز دیں گے؛ ناراض امیدوار عرفان سلیم کا دعویٰ

ساجد علی اتوار 20 جولائی 2025 13:09

ناراض پی ٹی آئی ارکان کا سینیٹ الیکشن میں کاغذات نامزدگی واپس نہ لینے ..

پشاور ( اُردو پوائنٹ اخبارتازہ ترین۔ 20 جولائی 2025ء ) پاکستان تحریک انصاف کے ناراض ارکان نے سینیٹ الیکشن میں کاغذات نامزدگی واپس نہ لینے کا اعلان کردیا۔ تفصیلات کے مطابق خیبرپختونخواہ میں سینیٹ الیکشن پاکستان تحریک انصاف کیلئے چیلنج بن چکا ہے جہاں ناراض ارکان کھل کر سامنے آگئے اور پی ٹی آئی کے ناراض امیدواروں نے کاغذات نامزدگی واپس نہ لینے کا اعلان کردیا، ناراض امیدواروں عرفان سلیم، وقاص اورکزئی، خرم ذیشان، ارشاد حسین اور عائشہ بانو نے دستبرداری سے انکار کر دیا۔

اس حوالے سے ناراض امیدوار خرم ذیشان نے کہا کہ ’میدان نہیں چھوڑوں گا‘ جب کہ عائشہ بانو کا اپنے بیاں میں کہنا تھا کہ ’دباؤ میں آئیں گے اور نہ ہی سودے بازی کریں گے، عمران خان کے نظریے پر آج بھی قائم ہیں‘، اسی طرح ایک اور ناراض امیدوار عرفان سلیم نے دعویٰ کیا کہ ’پی ٹی آئی کے 25 سے 30 ایم پی ایز رابطے میں ہیں، الیکشن میں سرپرائز دیں گے، سیاسی کمیٹی کی میٹنگ سے پہلے 13 کے مقابلے 11 ووٹوں سے فیصلہ ہوا کہ سینیٹ کا الیکشن کرایا جائے گا، بلامقابلہ نہیں ہوگا، اگر علی امین گنڈاپور کو پتا ہے 23 ایم پی ایز نے بیان حلفی دیا ہے تو ان کے نام سامنے لائیں۔

(جاری ہے)

دوسری طرف پی ٹی آئی پارلیمانی پارٹی میں بھی شدید اختلافات سامنے آئے ہیں جہاں مردان سے حکومتی رکن اسمبلی طارق محمود نے عرفان سلیم کو ووٹ دینے کا اعلان کر دیا، جب کہ سابق صوبائی وزیر شکیل خان نے بھی عرفان سلیم کی حمایت کردی، چیئرمین پاکستان تحریک انصاف بیرسٹر گوہر خان نے ناراض ارکان کیخلاف کارروائی کی وارننگ دیتے ہوئے کہا کہ ’ناراض ارکان دستبردار نہ ہوئے تو پارٹی ڈسپلن کے تحت کارروائی کریں گے اور انہیں پارٹی سے نکال دیا جائے گا‘۔