بنوں، پولیس کی بروقت کارروائی سے چیک پوسٹوں پر خوارج کے حملے کی کوشش ناکام، دہشتگرد پسپا ہو کرفرار

تھانہ ہوید بنوں کی حدود میں دو پولیس چیک پوسٹوں شیخ لنڈک پر ڈرون اور مزانگہ پر خوارج نے چھوٹے بڑے جدید ہتھیاروں سے حملے کئے، حملہ آوروں کا ہدف حساس تھرمل ٹیکنالوجی تھی پولیس تنصیبات مکمل طور پر محفوظ رہیں

فیصل علوی منگل 22 جولائی 2025 12:06

بنوں، پولیس کی بروقت کارروائی سے چیک پوسٹوں پر خوارج کے حملے کی کوشش ..

بنوں (اردوپوائنٹ اخبار تازہ ترین۔22جولائی 2025)خیبرپختونخواہ کے ضلع بنوں میں پولیس کی بروقت کارروائی سے پولیس چیک پوسٹوں پر خوارج کے حملے کی کوشش ناکام،دہشتگرد پسپا فرار ہوکرفرارہوگئے، حملہ آوروں کا ہدف حساس تھرمل ٹیکنالوجی تھی تاہم پولیس تنصیبات مکمل طور پر محفوظ رہیں،حکام کے مطابق موجودہ سیکیورٹی صورت حال کے پیش نظر حساس تنصیبات کی نگرانی مزید سخت کر دی گئی ہے جبکہ علاقے میں ہائی الرٹ نافذ ہے۔

پولیس کے مطابق گزشتہ شب تھانہ ہوید بنوں کی حدود میں دو پولیس چیک پوسٹوں شیخ لنڈک پر ڈرون اور مزانگہ پر خوارج نے چھوٹے بڑے جدید ہتھیاروں سے حملے کئے۔ حملے میں پولیس کی تھرمل کیمرہ ٹیکنالوجی کو نشانہ بنانے کی کوشش کی گئی تاہم پولیس اہلکاروں نے پیشہ ورانہ مہارت، دلیری اور ہوشیاری سے بروقت اور مؤثر جوابی کاروائی کرتے ہوئے دونوں حملوں کو پسپا کر دیا۔

(جاری ہے)

واقعے کے بعد پولیس نے علاقے میں سرچ اینڈ کلیئرنس آپریشن شروع کر دیا ہے۔ پولیس کا کہنا ہے کہ پولیس چوکی مزانگہ اور شیخ لنڈک پر خوارج کے حملے کی کوشش ناکام بنا دی پولیس کی بروقت جوابی کارروائی سے خوارج کے چوکیوں پر حملے ناکام بنا دئیے گئے۔پولیس کی بروقت اور بھرپور جوابی کارروائی کے باعث دہشت گرد پسپا ہو کر فرار ہوگئے۔ ممکنہ دہشت گردوں کی تلاش کے لیے قریبی علاقوں میں چھاپے مارے جا رہے ہیں۔

پولیس کی جانب سے علاقے میں سرچ اینڈ کلیئرنس آپریشن شروع کر دیا گیا ہے تاکہ فرار ہونے والے عناصر کو قانون کے کٹہرے میں لایا جا سکیں۔ سی پی او پشاور نے بتایا کہ دونوں مقامات پر پولیس فورسز چوکس تھیں جس کے باعث تھرمل ٹیکنالوجی کو نشانہ بنانے کی کوشش ناکام بنائی گئی۔انسپکٹر جنرل آف پولیس خیبرپختونخواہ ذوالفقار حمید اور ریجنل پولیس آفیسر بنوں سجاد خان نے بنوں پولیس کی جرات مندانہ کارروائی کو سراہتے ہوئے تمام جوانوں کو شاباش دی اور انعامات کا اعلان کرتے ہوئے کہا کہ یہ بزدلانہ کارروائیاں ہمارے حوصلے پست نہیں کر سکتیں۔

آئی جی پختونخوا ہ نے کہا کہ خیبرپختونخوا ہ پولیس ہر محاذ پر چوکنا، مستعد اور مکمل طور پر تیار ہے۔ آئندہ بھی ایسے تمام حملوں کا بھرپور اور جرات مندانہ انداز میں جواب دیا جائے گا۔انہوں نے کہا کہ پولیس فورس دہشت گردی کے خلاف جنگ میں فرنٹ لائن پر ہے اور عوام کے تحفظ کیلئے ہر ممکن قدم اٹھایا جائے گا۔