محسن نقوی دور میں پاکستان کرکٹ ٹیم کی شرمناک شکستوں کا نیا ریکارڈ بن گیا

لاہور (اُردو پوائنٹ اخبارتازہ ترین۔ 22 جولائی2025ء) محسن نقوی دور میں پاکستان کرکٹ ٹیم کی شرمناک شکستوں کا نیا ریکارڈ بن گیا، امریکا، آئرلینڈ کے ہاتھوں شکست، بنگلہ دیش کے ہاتھوں ٹیسٹ، ٹی ٹوئنٹی سیریز میں شکست، ٹیسٹ چیمپئن شپ میں آخری نمبر، پاکستان کرکٹ کے زوال نے شائقین کرکٹ کو پریشان کر دیا۔ تفصیلات کے مطابق محسن نقوی کے دور میں پاکستان کرکٹ کا شرمناک زوال جاری، بنگلہ دیش نے پہلی مرتبہ پاکستان کو ٹی ٹوئنٹی سیریز میں شکست دے دی، 134 رنز کے ہدف کے تعاقب میں پاکستان کی پوری ٹیم 125 رنز پر پویلین واپس لوٹ گئی، یوں پہلی مرتبہ بنگلہ دیش پاکستان کیخلاف ٹی ٹوئنٹی سیریز اپنے نام کرنے میں کامیاب ہو گیا، اس سے قبل گزشتہ برس بنگلہ دیش پاکستان کو پہلی مرتبہ ٹیسٹ سیریز میں بھی شکست دے چکا، یوں چئیرمین پی سی بی محسن نقوی کے دور میں پاکستان نے ایک اور شرمناک شکست اپنے نام کر لی، محسن نقوی کے چئیرمین پی سی بی بننے کے بعد پاکستان ٹی ٹوئنٹی ورلڈکپ میں امریکا سے شکست کھا چکا، آئرلینڈ کے ہاتھوں بھی پاکستان کو شکست ہو چکی، پاکستان ہوم گراونڈ پر کمزور ویسٹ انڈیز کیخلاف ٹیسٹ سیریز جیتنے میں بھی ناکام رہا، جبکہ ورلڈکپ ٹیسٹ چیمپئن شپ میں پاکستان کو آخری نمبر ملا۔

(جاری ہے)

منگل کے روز میرپور کے شیر بنگلا کرکٹ سٹیڈیم میں ہونیوالے ٹی 20 سیریز کے دوسرے میچ میں پاکستان کرکٹ ٹیم کے کپتان سلمان آغا نے ٹاس جیت کر میزبان ٹیم کے کپتان کو پہلے بیٹنگ کی دعوت دی۔ پہلے بیٹنگ کرتے ہوئے میزبان ٹیم مقررہ 20 اوورز میں 133 رنز بناسکی، ذاکر علی 55 رنز کیساتھ نمایاں رہے، مہدی حسن 33، پرویز حسین ایمان 13، رشاد حسین 8، کپتان لٹن داس 8، تنظیم حسین ثاقب 7، محمد نعیم 3، شریف الاسلام 1، شمیم حسین 1 اور توحید ہردوئے 0 کے انفرادی اسکور پر آؤٹ ہوئے۔

پاکستان کی جانب سے سلمان مرزا، ڈیبیو کرنے والے احمد دانیال اور عباس آفریدی نے 2، 2 وکٹیں حاصل کیں۔ محمد نواز اور فہیم اشرف نے 1، 1 کھلاڑی کو آؤٹ کیا۔ پاکستان کو بنگال ٹائیگرز کے ہاتھوں تاریخی رسوائی سے بچنے کیلیے آج کے میچ میں لازمی فتح درکار ہے۔ واضح رہے کہ میزبان ٹیم نے پہلے ٹی ٹوئنٹی میں پاکستان کو 7وکٹوں سے شکست دی تھی، بنگلا دیش نے 111 رنز کا ہدف 3 وکٹوں کے نقصان پر حاصل کیا تھا۔ بنگلا دیش کو 3 میچوں کی سیریز میں 2 صفر کی فیصلہ کن برتری حاصل ہو گئی۔