دوسرا آل پاکستان میراویس مہمند والی بال ٹورنامنٹ اختتام پذیر، محمد شاہ کلب نے ٹرافی جیت لی

بدھ 23 جولائی 2025 02:25

غلنئی (اُردو پوائنٹ اخبارتازہ ترین - این این آئی۔ 23 جولائی2025ء)ضلع مہمند میں دوسرا آل پاکستان میراویس مہمند والی بال ٹورنامنٹ اختتام پذیر، محمد شاہ کلب نے ٹرافی جیت لی۔ضلع مہمند کے ہیڈکوارٹر غلنئی میں واقع شہید کیپٹن روح اللہ سپورٹس اسٹیڈیم میں دوسرا آل پاکستان میراویس مہمند والی بال ٹورنامنٹ کامیابی کے ساتھ اختتام پذیر ہوگیا۔ اس چار روزہ ایونٹ میں ملک کے مختلف دور دراز علاقوں سے تعلق رکھنے والی 16 نامور ٹیموں نے شرکت کی۔

ٹورنامنٹ کا انعقاد الحامد منرل کمپنی کے حاجی حامد مہمند اور میراویس خان مہمند کی تعاون سے، اسماعیل شیدا کی نگرانی میں کیا گیا۔ شاندار انتظامات اور بڑے پیمانے پر عوام کی شرکت نے اس ایونٹ کو یادگار بنا دیا۔ٹورنامنٹ کے سیمی فائنل میں شاندار کھیل کے بعد محمد شاہ کلب اور نگلی کلب فائنل میں پہنچ گئے۔

(جاری ہے)

فائنل میچ انتہائی سنسنی خیز اور دلچسپ ثابت ہوا۔

دونوں ٹیموں نے شاندار کھیل کا مظاہرہ کیا اور پانچ پانچ سیٹ جیت کر مقابلہ برابر کر دیا۔ میچ کے اختتام پر آرگنائزنگ کمیٹی نے کھیل کی روح کو مدنظر رکھتے ہوئے دونوں ٹیموں میں انعامات برابر تقسیم کیے، تاہم بہترین کارکردگی کی بنیاد پر ٹرافی محمد شاہ کلب کے حوالے کر دی گئی۔ٹورنامنٹ میں عوام کی بھرپور شرکت نے ثابت کیا کہ عوام کھیلوں میں دلچسپی لیتے ہیں اس لیے ہزاروں کی تعداد میں شائقین نے میدان میں آ کر کھلاڑیوں کی حوصلہ افزائی کی۔ مقامی عوام اور مہمانوں نے ٹورنامنٹ کو کھیلوں کے فروغ کی جانب ایک مثبت قدم قرار دیا اور مستقبل میں بھی ایسے مقابلوں کے انعقاد کی خواہش کا اظہار کیا۔