پاکستان اور بنگلہ دیش کا مخصوص پاسپورٹ پر ویزہ فری انٹری دینے پر اتفاق

ڈھاکہ ( اُردو پوائنٹ اخبارتازہ ترین۔ 23 جولائی 2025ء ) پاکستان اور بنگلہ دیش نے سفارتی و سرکاری پاسپورٹس پر ویزہ فری انٹری کی سہولت دینے پر اصولی طور پر اتفاق کر لیا، دونوں ممالک کے دوطرفہ تعلقات مزید بڑھانے کے لیے مشترکہ کمیٹی بھی تشکیل دے دی گئی۔ تفصیلات کے مطابق وفاقی وزیر داخلہ محسن نقوی نے ڈھاکہ میں بنگلا دیشی ہم منصب لیفٹیننٹ جنرل ریٹائرڈ جہانگیر عالم چوہدری سے ملاقات کی، وزارت داخلہ پہنچنے پر بنگلا دیشی ہم منصب نے محسن نقوی کا پرتپاک خیرمقدم کیا، انہیں گارڈ آف آنرز پیش کیا گیا، پاکستان اور بنگلہ دیش کے وزراء داخلہ کی ملاقات میں باہمی دلچسپی کے امور اور پاک بنگلہ دیش دوطرفہ تعلقات پر تبادلہ خیال کیا گیا۔

بتایا گیا ہے کہ ملاقات میں دونوں وزرائے داخلہ نے انٹرنل سکیورٹی اور پولیس ٹریننگ کے شعبوں میں تعاون بڑھانے پر اتفاق کیا، اس موقع پر پاکستان اور بنگلہ دیش میں دوطرفہ تعاون کو فروغ دینے کے لیے مشترکہ کمیٹی تشکیل دے دی گئی، پاکستان کی طرف سے وفاقی سیکریٹری داخلہ خرم آغا کمیٹی کے سربراہ ہوں گے، بنگلہ دیش کا اعلیٰ سطح کا وفد عنقریب سیف سٹی پراجیکٹ اور نیشنل پولیس اکیڈمی کا دورہ کرنے اسلام آباد پہنچے گا۔

(جاری ہے)

معلوم ہوا ہے کہ ملاقات کے دوران انسداد منشیات و انسداد انسانی سمگلنگ کے لیے اشتراک کار بڑھانے پر بات چیت کی گئی اور انسداد دہشت گردی کے لیے مشترکہ اقدامات کرنے پر بھی تبادلہ خیال کیا گیا، پولیس اکیڈمیوں میں ٹریننگ پروگرامز کے باہمی تبادلوں پر بھی گفتگو ہوئی، لیفٹیننٹ جنرل ریٹائرڈ جہانگیر عالم نے پولیس ٹریننگ کی پیشکش پرپاکستانی ہم منصب محسن نقوی کا شکریہ ادا کیا۔

بتایا جارہا ہے کہ بنگلہ دیش کے وزیر مملکت داخلہ خدا بخش، سیکرٹری داخلہ نسیم الغنی، ایڈیشنل سیکرٹری سکیورٹی ڈویژن شمیم خان اور پاکستان ہائی کمیشن کے ناظم الامور محمد واصف، پولیٹیکل قونصلر کامران دونگل سمیت اعلیٰ حکام اس موقع پر موجود تھے جہاں بنگلہ دیشی وزیر داخلہ لیفٹیننٹ جنرل ریٹائرڈ جہانگیر عالم نے کہا کہ ڈھاکہ آمد پر اپنے بھائی کو دل کی اتھاہ گہرائیوں سے خوش آمدید کہتے ہیں، آپ کا دورہ پاک بنگلا دیش دوطرفہ تعلقات کو فروغ دینے کیلئے انتہائی اہم ہے۔