Live Updates

کوئی تو ہے جو خوفزدہ ہے اسی لیے چُن چُن کر سزائیں دی جا رہی ہیں، علیمہ خان

ان کو خوف ہے کہیں عمران خان کا ایک لفظ بھی باہر نہ آئے، 26 ویں ترمیم کے اثرات آپ دیکھ سکتے ہیں کیسے ججز کے احکامات کو نظر انداز کیا جارہا ہے، انصاف کا نظام اور ججز بے بس ہوچکے؛ میڈیا سے گفتگو

ساجد علی ہفتہ 26 جولائی 2025 16:12

کوئی تو ہے جو خوفزدہ ہے اسی لیے چُن چُن کر سزائیں دی جا رہی ہیں، علیمہ ..

راولپنڈی ( اُردو پوائنٹ اخبارتازہ ترین۔ 26 جولائی 2025ء ) پاکستان تحریک انصاف کے پیٹرن انچیف عمران خان کی ہمشیرہ علیمہ خان کا کہنا ہے کہ کارکنوں کو چن چن کر سزائیں دی جا رہی ہیں، اس سے ظاہر ہوتا ہے کہ کوئی تو ہے جو خوفزدہ ہے۔ راولپنڈی کی اڈیالہ جیل کے باہر میڈیا سے گفتگو کرتے ہوئے انہوں نے بتایا کہ آج جیل میں توشہ خانہ ٹو کیس کی سماعت ہونا تھی صبح 11 بجے سے ہم جیل کے باہر کھڑے رہے، پراسیکیوشن کے 8 سے 9 لوگ اندر جاتے ہیں، کیسے ہوسکتا ہے ایک وکیل اپنی ٹیم کے بغیر سماعت میں شامل ہو؟ یہ فیئر ٹرائل کیسے ہوگا جب وکلا کو اندر نہیں جانے دیں گے؟ جج نے کہا فیملی اور وکلاء کو اندر آنے دیں۔

علیمہ خان نے کہا کہ 26 ویں ترمیم کے اثرات اب آپ لائیو دیکھ سکتے ہیں کہ کیسے ججز کے احکامات کو نظر انداز کیا جارہا ہے، عمران خان کی وجہ سے جج بھی بے بس ہیں، ملک میں انصاف کا نظام اور ججز بے بس ہوچکے ہیں، یہی وجہ ہے عمران خان نے کہا ہے کہ تحریک شروع کریں، بانی نے کہا ہے عوام اپنے حق کے لیے کھڑے ہوں لیکن ان کو یہ ڈر ہے کہیں تحریک نہ چلے، اسی لیے پی ٹی آئی کے کارکنوں کو چن چن کے سزائیں دی جارہی ہیں کوئی تو ہے جو ڈرا ہوا ہے، میرے وکلاء نے مجھے کہا آپ کی ضمانت کی درخواست دائر کرنی ہے کیوں کہ آپ کو گرفتار کیا جائے گا لیکن ہمیں ان خوفزدہ لوگوں سے کوئی ڈر نہیں ہے۔

(جاری ہے)

ان کا کہنا ہے کہ ان کو خوف ہے کہیں عمران خان کا ایک لفظ بھی باہر نہ آئے، بانی بار بار 9 مئی کے واقعات کی سی سی ٹی وی فوٹیجز کا مطالبہ کررہے ہیں، عوام کو اپنی آزادی کے لیے اب خود نکلنا پڑے گا، اس کے لیے ہمیں انتظار نہیں کرنا چاہیئے، عمران خان باہر آئے گا تو تحریک چلے گی، پارٹی نے لائحہ عمل دینا ہے، لوگوں نے خود نکلنا ہے، 5 اگست جب آئے گا تو دیکھا جائے گا، شکوک شبہات کی کوئی بات نہیں ہے میں نے ہمیشہ کہا ہے سب نکلیں گے جس کا پلان بنا ہوا ہے۔