وفاقی وزیر شزا فاطمہ خواجہ سے گواڈونگ گروپ کے بانی کی ملاقات، آئی سی ٹی اور نیو انرجی سیکٹرز میں سرمایہ کاری کے مواقع پر تبادلہ خیال

اتوار 27 جولائی 2025 15:00

شنگھائی (اُردو پوائنٹ اخبارتازہ ترین - اے پی پی۔ 27 جولائی2025ء) وفاقی وزیر شزا فاطمہ خواجہ سے چین کے گواڈونگ گروپ کے بانی نے ملاقات کی اور پاکستان کے آئی سی ٹی اور نیو انرجی سیکٹرز میں سرمایہ کاری کے مواقع پر تبادلہ خیال کیا۔یہاں جاری بیان کے مطابق شنگھائی میں جاری گلوبل آرٹیفیشل انٹیلیجنس کانفرنس کے موقع پر گواڈونگ گروپ کے بانی اور چیئرمین مسٹر لو جی کی قیادت میں ایک تین رکنی وفد نے وفاقی وزیر برائے انفارمیشن ٹیکنالوجی و ٹیلی کمیونیکیشن شزا فاطمہ خواجہ سے اتوار کو ملاقات کی۔

وفد نے پاکستان کے آئی سی ٹی سیکٹر بالخصوص ٹیلی کمیونیکیشن ٹاورز، ڈیٹا سینٹرز اور کلاؤڈ کمپیوٹنگ انفراسٹرکچر کے شعبوں میں سرمایہ کاری میں گہری دلچسپی کا اظہار کیا ۔ مسٹر لو جی نے پاکستان میں الیکٹرک گاڑیوں کے چارجنگ اسٹیشنز، سمارٹ سٹی حل اور جدید مٹیریل مینوفیکچرنگ جیسے نیو انرجی شعبوں میں سرمایہ کاری کی خواہش کا بھی اظہار کیا۔

(جاری ہے)

وفاقی وزیر نے سرمایہ کاری کی تجاویز کا خیرمقدم کرتے ہوئے گواڈونگ گروپ کو پاکستان کا دورہ کرنے کی دعوت دی تاکہ متعلقہ اسٹیک ہولڈرز کے ساتھ مزید تفصیلی مشاورت کی جا سکے۔ انہوں نے وفد کو حکومتِ پاکستان کی جانب سے مکمل تعاون اور سہولیات کی یقین دہانی کروائی۔ وفاقی وزیر نے زور دیا کہ یہ اقدامات وزیراعظم شہباز شریف کے وژن’’ڈیجیٹل نیشن پاکستان‘‘ کے عین مطابق ہیں جس کا مقصد پاکستان کو ٹیکنالوجی، شمولیتی ترقی اور جدید ڈیجیٹل انفراسٹرکچر کے ذریعے ترقی کی نئی راہوں پر گامزن کرنا ہے۔