بی جے پی کی ریاستی حکومتیں بنگالی بولنے والے شہریوں کو نشانہ بنارہی ہیں، ہیومن رائٹس واچ

پیر 28 جولائی 2025 19:01

نئی دہلی (اُردو پوائنٹ اخبارتازہ ترین - این این آئی۔ 28 جولائی2025ء)انسانی حقوق کے عالمی ادارے ہیومن رائٹس واچ نے بی جے پی کی زیرقیادت ریاستی حکومتوں میں بنگالی بولنے والے شہریوں کے ساتھ ہونے والے امتیازی سلوک اور مظالم کی تفصیلی رپورٹ جاری کی ہے۔کشمیرمیڈیاسروس کے مطابق ریاست مغربی بنگال کی وزیراعلی ممتا بینرجی نے اس رپورٹ کو اپنے ایکس اکائونٹ پر شیئر کرتے ہوئے مودی حکومت کو سخت تنقید کا نشانہ بنایا۔

ممتا بینرجی نے کہا کہ ہیومن رائٹس واچ نے اپنی رپورٹ میں وہی بات کہی ہے جو ہم برسوں سے دہرا رہے ہیں۔ بی جے پی کی ریاستی حکومتیں صرف بنگالی زبان کی بنیاد پر شہریوں کو نشانہ بنا رہی ہیں۔ انہوں نے کہا کہ یہ مظالم مرکزی حکومت کی ہدایات پر منظم انداز میں کیے جا رہے ہیں۔

(جاری ہے)

رپورٹ کے مطابق بی جے پی کی ریاستی حکومتیں لسانی تعصب کی بنیاد پر اقلیتوں کو غیرقانونی مہاجر قرار دے کر ملک بدر کر رہی ہیں۔

ہیومن رائٹس واچ کی ڈائریکٹربرائے ایشیا ایلین پیئرسن نے واضح کیا کہ بی جے پی بنگالی بولنے والے افراد، حتی کہ بھارتی شہریوں کو بھی بلاوجہ نشانہ بنا رہی ہے۔ممتا بینرجی نے کہا کہ یہ ہدایات وزیر داخلہ امیت شاہ کی سربراہی میں وزارت داخلہ کی جانب سے جاری کی گئی ہیں۔ انہوں نے کہا کہ اب بین الاقوامی ادارے بھی بھارت میں لسانی دہشت گردی کا نوٹس لے رہے ہیں۔

رپورٹ میں کہا گیا ہے کہ یہ ہراسانی، جبر اور بے دخلی مودی حکومت کی انتہا پسند ہندوتوا پالیسی کا حصہ ہے۔ زبان کی بنیاد پر ملک بدری بھارتی آئین کے آرٹیکل 14اور 19کی صریح خلاف ورزی ہے۔ممتا بینرجی نے کہا کہ بی جے پی بھارت کو سیکولرزم سے ہٹا کر ہندو اکثریتی ریاست میں بدل رہی ہے۔ بنگالیوں کی بے دخلی بی جے پی کا ہندو ووٹ بینک بڑھانے کا ہتھکنڈہ ہے۔انہوں نے خبردار کیا کہ اقلیتوں کو ختم کرکے ہندوتوا نظریے پر آمریت قائم کرنا بی جے پی کی سازش ہے۔ بین الاقوامی ادارے کی یہ رپورٹ مودی حکومت کی اقلیت دشمن پالیسیوں پر عالمی سطح پر سوالات کھڑے کر رہی ہے۔