کمشنر راولپنڈی ڈویژن انجینئر عامر خٹک کا 5 اگست کو یومِ استحصال کی تیاریوں کے حوالے سے جائزہ اجلاس کا انعقاد

جمعہ 1 اگست 2025 20:30

راولپنڈی (اُردو پوائنٹ اخبارتازہ ترین - اے پی پی۔ 01 اگست2025ء) کمشنر راولپنڈی ڈویژن انجینئر عامر خٹک نے 5 اگست کو یومِ استحصال کی تیاریوں کے حوالے سے جائزہ اجلاس کی صدارت کی اور تمام متعلقہ محکموں کو ہدایت کی کہ اس دن کو مؤثر طور پر منانے کے لیے ہم آہنگی کے ساتھ کام کریں۔ انہوں نے کہا کہ یوم استحصال کے موقع پر کشمیری عوام کی آواز پوری دنیا تک پہنچائی جائے گی اور پاکستانی قوم جموں و کشمیر کے مسئلے کے منصفانہ حل کے لیے اپنی جدوجہد جاری رکھے گی۔

انہوں نے مزید کہا کہ اس سال یومِ استحصال کی اہمیت پاکستان کی بنیان المرصوص میں کامیابی کی وجہ سے کئی گنا بڑھ گئی ہے۔ انتظامیہ کی جانب سے 5 اگست کی تقریبات میں مقبوضہ کشمیر کی خصوصی حیثیت کے خاتمے اور وہاں نہتے کشمیریوں پر ڈھائے جانے والے بھارتی مظالم کو اجاگر کیا جائے گا۔

(جاری ہے)

اسکولوں اور کالجز میں تقاریر، تقریری مقابلے اور تصویری نمائشوں کا انعقاد ہوگا جبکہ شہر کے اہم چوکوں اور مقامات پر کشمیری عوام پر ڈھائے جانے والے مظالم کے عکس کے ذریعے دنیا کی توجہ اس انسانی المیے کی جانب مبذول کرائی جائے گی۔

اس موقع پر انتظامات کے حوالے سے بریفنگ دیتے ہوئے بتایا گیا کہ راولپنڈی ڈویژن میں 5 اگست کو ''یومِ استحصالِ کشمیر'' کے موقع پر کشمیری بھائیوں سے اظہارِ یکجہتی کے لیے مختلف تقریبات کا انعقاد کیا جائے گا۔ ان تقریبات میں سرکاری و نجی تعلیمی ادارے، تاجر تنظیمیں، اور مختلف سرکاری و غیر سرکاری ادارے بھرپور شرکت کریں گے۔یومِ استحصال کی مناسبت سے راولپنڈی آرٹس کونسل میں ڈاکومنٹری فلمز اور ڈراموں کا اہتمام کیا گیا ہے، جن میں عوام الناس کے لیے داخلہ بالکل مفت ہوگا۔

اسی طرح ڈویژن بھر کی تمام تحصیلوں اور راولپنڈی شہر میں کشمیری عوام کے ساتھ اظہارِ یکجہتی کے لیے واکس کا انعقاد کیا جائے گا۔ شہروں کی سڑکوں، چوراہوں اور اہم مقامات پر استحصالِ کشمیر کو اجاگر کرنے کے لیے بینرز اور بل بورڈز نصب کیے جائیں گے۔