پنجاب حکومت کا سموگ اور ماحولیاتی آلودگی کے خاتمے کیلئے گرین کوریڈورمنصوبہ شروع کرنے کا فیصلہ

لاہور (اُردو پوائنٹ اخبارتازہ ترین۔ یکم اگست 2025ء) حکومت پنجاب نے سموگ اور ماحولیاتی آلودگی جیسے سنگین مسائل کے دیرپا حل کے لیے ایک اور اہم قدم اٹھاتے ہوئے وزیر اعلیٰ پنجاب مریم نواز شریف کے وژن کے مطابق گرین کوریڈور منصوبہ شروع کرنے کا فیصلہ کیا ہے۔ منصوبے کے تحت لاہور میں شاہدرہ سے رائیونڈ کے درمیان ریلوے ٹریک کے دونوں اطراف واقع اراضی کو سرسبز گرین بیلٹس میں تبدیل کیا جائے گا۔

منصوبہ سینئر منسٹر پنجاب مریم اورنگزیب کی خصوصی دلچسپی اور قیادت میں پایہ تکمیل تک پہنچے گا۔ ماحولیاتی بہتری کے لیے ان کی مسلسل کوششوں اور پالیسی اقدامات نے اس نوعیت کے منصوبوں کی راہ ہموار کی ہے جو نہ صرف شہریوں کو بہتر ماحول فراہم کریں گے بلکہ ماحولیاتی استحکام کی جانب بھی اہم سنگ میل ثابت ہوں گے۔

(جاری ہے)

پارکس اینڈ ہارٹیکلچر اتھارٹی (PHA) اور پاکستان ریلویز کے اشتراک سے اس منصوبے پر عملدرآمد کیا جائے گا جبکہ منصوبے کی مجموعی نگرانی محکمہ ہاؤسنگ پنجاب کرے گا۔

ترجمان محکمہ ہاؤسنگ کے مطابق منصوبہ ایک سال کے اندر مکمل کیا جائے گا، جس کی کل لمبائی 40 کلومیٹر اور رقبہ تقریباً 700 کنال ہے۔ منصوبے پر مجموعی لاگت تقریباً 2.355 ارب روپے آئے گی۔ترجمان محکمہ ہاؤسنگ کے مطابق، منصوبے کو چار پیکیجز میں تقسیم کیا گیا ہے۔ پہلے پیکیج میں شاہدرہ سے لاہور ریلوے اسٹیشن، دوسرے میں ریلوے اسٹیشن سے والٹن، تیسرے میں والٹن سے کوٹ لکھپت، اور چوتھے میں کوٹ لکھپت سے رائیونڈ تک کام مکمل کیا جائے گا۔

منصوبے کے تحت مختلف مقامات پر شہریوں کے لیے تفریحی سرگرمیوں کے مراکز بھی قائم کیے جائیں گے جبکہ ریلوے کی پرانی بوگیوں کو جدید طرز کی لائبریریوں اور کیفیز میں تبدیل کیا جائے گا، جو نہ صرف گرین بیلٹ کی خوبصورتی میں اضافہ کریں گے بلکہ شہریوں کے لیے ایک مثبت تفریحی و تعلیمی ماحول فراہم کریں گے۔وزیر اعلیٰ پنجاب کی ہدایت پر لاہور شہر میں گرین ایریاز کو وسعت دینے کا یہ منصوبہ شہریوں کو صاف فضا، تفریحی مواقع اور ماحول دوست شہر فراہم کرنے کی جانب ایک بڑی کوشش ہے۔

مزید برآں سینٸرصوباٸی وزیر مریم اورنگزیب کی زیرصدارت اجلاس ہوا جس میں انہوں نے کہا کہ وزیر اعلیٰ پنجاب مریم نواز شریف کی منظوری سے پنجاب حکومت نے ’پے پلوٹرز رولز‘ (Pay Polluters Rules) کو ماحولیاتی قانون کا باقاعدہ حصہ بنا دیا ہے۔ اس نئے قانون کے تحت آلودگی پھیلانے والوں پر بھاری جرمانے عائد کیے جائیں گے تاکہ عوام کو مہلک بیماریوں سے بچایا جا سکے۔

اس حوالے سے سینئر وزیر مریم اورنگزیب کا کہنا تھا کہ پنجاب ملک کا پہلا صوبہ بن گیا ہے جس نے عالمی معیار کے مطابق آلودگی پر قابو پانے کے لیے مؤثر قانونی نظام قائم کیا ہے۔ اس سلسلے میں صوبے کو 10 زونز میں تقسیم کر کے ہر زون کی جدید ڈیجیٹل نگرانی کا سمارٹ سسٹم نافذ کر دیا گیا ہے۔ انہوں نے مزید کہا کہ نئے نظام کے تحت ’خبردار‘ نامی خودکار الرٹ سسٹم آلودگی کی صورت میں فوری اطلاع دے گا جس پر ای پی اے فورس (EPA Force) فوری کارروائی کرے گی۔

ہر زون کے لیے زونل انچارجز اور انسپکٹرز تعینات کیے جا چکے ہیں جبکہ مانیٹرنگ اسکوارڈز نے فیلڈ میں کام شروع کر دیا ہے۔ یہ جدید نظام صنعتوں کی چمنیوں، بھٹوں اور گاڑیوں سے نکلنے والے زہریلے دھوئیں کو ٹیکنالوجی کے ذریعے جانچے گا۔ آرٹیفیشل انٹیلی جنس (AI) کی مدد سے اگر دھواں مقررہ مقدار یا معیار سے زیادہ ہوا تو مرکزی ڈیجیٹل نظام کو فوری اطلاع دی جائے گی اور متعلقہ دستہ فوری کارروائی کرے گا۔

یہ نظام صنعتوں کے زہریلے مواد کو پانی میں بہانے، کچرے کو آگ لگانے اور پلاسٹک جلانے جیسے عوامل پر بھی مکمل نظر رکھے گا۔ ہر زون میں ڈرون کیمرے، خصوصی گاڑیاں اور فوری رسپانس ٹیکنالوجی بھی فراہم کر دی گئی ہے۔ ای پی اے فورس کے لیے 25 کروڑ روپے کی لاگت سے ہیڈکوارٹر بنانے کی منظوری دے دی گئی ہے۔ ساتھ ہی گرین لائن ماحولیاتی انفراسٹرکچر کی تیاری کی بھی منظوری دی گئی ہے۔

گرین کریڈٹ پروگرام کے تحت ای بائیکس، ای-رکشہ اور سپر سیڈر جیسے انقلابی منصوبے شامل کیے گئے ہیں۔ اس کے علاوہ پنجاب کی پہلی ڈیجیٹل کلائمیٹ موومنٹ کا آغاز بھی کر دیا گیا ہے۔ سینئر صوبائی وزیر مریم اورنگزیب نے کہا ہے کہ گرین اسکول پروگرام اور صاف و سرسبز علاقوں کے تصور کو فروغ دینے کے لیے عوامی مہم بھی چلائی جائے گی۔ انہوں نے اس بات پر بھی فخر کا اظہار کیا کہ برازیل میں ہونے والی ماحولیاتی کانفرنس 2025 میں پنجاب کو نمائندگی دی جائے گی، جو وزیر اعلیٰ مریم نواز شریف کی تاریخی ماحولیاتی کوششوں کا عالمی اعتراف ہے۔