Live Updates

پی ڈی ایم اے پنجاب کی مون سون سیلاب کی صورتحال بارے فیکٹ شیٹ جاری

ہفتہ 2 اگست 2025 12:19

لاہور (اُردو پوائنٹ اخبارتازہ ترین - اے پی پی۔ 02 اگست2025ء) وزیر اعلی پنجاب کی ہدایات کے پیشِ نظر پی ڈی ایم اے پنجاب کی مون سون سیلاب کی صورتحال بارے فیکٹ شیٹ جاری کر دی۔رواں سال موسم مون سون بارشوں کے باعث مختلف حادثات میں 162 شہری جاں بحق ،571 زخمی، 214 گھر متاثر اور 121 مویشی ہلاک ہوئے۔ ترجمان پی ڈی ایم اے کے مطابق گزشتہ 24 گھنٹوں میں صوبائی دارالحکومت لاہور، راولپنڈی، بہاولنگر، مری، چکوال، ساہیوال، نارووال، اوکاڑہ اور اٹک میں بارشیں ریکارڈ کی گئیں۔

آ ئندہ 24 گھنٹوں میں پنجاب کے بیشتر اضلاع میں بارشیں متوقع ہیں۔ مون سون بارشوں کا چھٹا اسپیل 5 اگست سے شروع ہونے کی پیشگوئی کی گئی ہے ۔ ترجمان کے مطابق رواں سال موسم مون سون بارشوں کے باعث مختلف حادثات میں 162 شہری جاں بحق جبکہ 571 زخمی، 214 گھر متاثر اور 121 مویشی ہلاک ہوئے۔

(جاری ہے)

ڈی جی پی ڈی ایم اے عرفان علی کاٹھیا نے کہا ہے کہ وزیر اعلی پنجاب کی ہدایات کے پیشِ نظر متاثرہ فیملیز کو مالی معاونت فراہم کی جا رہی ہے۔

ڈی جی پی ڈی ایم اے نے انتظامیہ کو الرٹ رہنے کی ہدایات کرتے ہوئے کہا ہے کہ دریائے چناب میں خانکی اوردریائے سندھ میں کالا باغ چشمہ تونسہ کے مقام پر نچلے درجے کا سیلاب ہے جبکہ تربیلا کے مقام پر پانی کا بہا ئو نارمل سطح پر ہے۔دریائے جہلم راوی اور ستلج میں پانی کا بہائو نارمل سطح پر ہے۔رودکوہیوں اور بڑے دریائوں سے ملحقہ ندی نالوں میں بھی پانی کا بہائو نارمل سطح پر ہے۔

ڈی جی عرفان علی کاٹھیا نے کہا کہ تربیلا ڈیم میں پانی کی سطح 89 فیصد جبکہ منگلا ڈیم 61 فیصد تک بھر چکاہے۔ بھارتی ڈیمز میں پانی کی سطح 43 فیصد تک ہے۔ ڈی جی پی ڈی ایم اے نے کہا کہ شہریوں سے اپیل ہے کہ موسم برسات میں احتیاطی تدابیر اختیار کریں۔ بچوں کا خیال رکھیں، انہیں برساتی نالوں نشیبی علاقوں دریائوں اور نہروں میں ہرگز مت نہانے دیں۔