پاک ایران وزرائے دفاع کی ملاقات، علاقائی امن اور دفاعی تعاون کے عزم کا اعادہ

ہفتہ 2 اگست 2025 23:30

اسلام آباد (اُردو پوائنٹ اخبارتازہ ترین - اے پی پی۔ 02 اگست2025ء) اسلامی جمہوریہ ایران کے وزیر دفاع بریگیڈیئر جنرل عزیز ناصر زادہ نے وزیر دفاع خواجہ محمد آصف سے اسلام آباد میں ملاقات کی، ملاقات کے دوران دونوں رہنمائوں نے دوطرفہ تعلقات کو مضبوط بنانے اور خطے میں امن اور استحکام کو فروغ دینے کے عزم کا اعادہ کیا۔ وزارتِ دفاع کی جانب سے جاری بیان کے مطابق اس ملاقات میں دونوں اطراف نے باہمی دلچسپی کے امور پر تبادلہ خیال کیا، جن میں علاقائی سلامتی، دہشت گردی کے خلاف اقدامات اور پڑوسی ممالک کے درمیان دفاعی تعاون کے فروغ کے طریقے شامل ہیں۔

وزرائے دفاع نے دونوں ممالک کے درمیان دوطرفہ تعلقات کو مضبوط بنانے، خطے میں امن اور استحکام کو فروغ دینے کے عزم کا اعادہ کیا۔

(جاری ہے)

پاکستان کے وزیر دفاع نے ایران کے مسلسل تعاون کی تعریف کی اور مشترکہ سلامتی کے چیلنجز سے نمٹنے میں دفاعی سفارت کاری کی اہمیت پر زور دیا۔ ایرانی وزیر دفاع نے پاکستانی حکومت کے پرتپاک استقبال پر شکریہ ادا کیا اور باہمی احترام، مشترکہ اقدار اور اعتماد پر مبنی مضبوط دفاعی تعلقات کی خواہش کا اظہار کیا۔ ملاقات مثبت انداز میں اختتام پذیر ہوئی، دونوں رہنمائوں نے پاک ایران دفاعی تعلقات کے مستقبل کے حوالے سے پرامیدی کا اظہار کیا اور خطے کی خوشحالی اور سلامتی کے لیے مل کر کام جاری رکھنے کا عہد کیا۔