پاکستان کی جانب سے جنگ سے متاثرہ فلسطینی عوام کیلئے 100 ٹن امدادی سامان پیر کو روانہ کیا جائے گا

اتوار 3 اگست 2025 22:40

اسلام آباد (اُردو پوائنٹ اخبارتازہ ترین - اے پی پی۔ 03 اگست2025ء) پاکستان کی جانب سے غزہ، فلسطین کے عوام کے ساتھ اظہارِ یکجہتی کے طور پر 100 ٹن امدادی سامان پر مشتمل ایک خصوصی پرواز کل پیر کے روز اسلام آباد انٹرنیشنل ایئرپورٹ سے روانہ ہوگی۔ یہ امدادی کارروائی وزیراعظم محمد شہباز شریف کی خصوصی ہدایت پر نیشنل ڈیزاسٹر مینجمنٹ اتھارٹی (این ڈی ایم اے) کے زیرِ اہتمام انجام دی جا رہی ہے۔

وزیراعظم کی خصوصی ہدایت پر پاکستان کی جانب سے غزہ کے لیے مزید امدادی سامان روانگی کی تقریب منعقد ہوئی،غزہ کے لیے 200ٹن امدادی سامان دو خصوصی پروازوں کے ذریعے روانہ کرنے کی منصوبہ بندی کی گئی ہے ۔اسلام آباد انٹر نیشنل ائیر پور ٹ سے 100 ٹن امدادی سامان پر مشتمل 17ویں کھیپ بذریعہ خصوصی پرواز کل پیر کو راونہ ہو گی جبکہ مزید 100 ٹن امدادی سامان چند دنوں میں روانہ کیا جائے گا۔

(جاری ہے)

17 ویں کھیپ میں 65ٹن تیار کھانا، 20 ٹن بچو ں کے لیے خشک دودھ، 5 ٹن بسکٹ اور 10 ٹن ادویات شامل ہیں،اب تک 17امدادی کھیپوں کے ذریعے بھیجی گئی امداد کا مجموعی وزن 1,715 ٹن ہے۔ اگلے چند دنوں میں روانہ ہونے والی دوسری پرواز کے ساتھ یہ مجموعی وزن 1,815 ٹن تک پہنچ جائے گا۔سامان روانگی کی تقریب میں نائب وزیر اعظم اور وزیر خارجہ سینیٹر محمداسحاق ڈار اور چئیرمین این ڈی ایم اے لیفٹنینٹ جنرل انعام حیدر ملک نے بطور مہمان خصوصی شرکت کی۔

تقریب میں وزارت خارجہ، این ڈی ایم اے کے اعلی افسران اور الخدمت فاؤنڈیشن کے نمائندے بھی موجود تھے۔نائب وزیراعظم نے سامان کی فوری روانگی یقینی بنانے پر این ڈی ایم اے،الخدمت فاؤنڈیشن اور دیگر فلاحی اداورں کی کوششوں کو سراہا اور ان کا شکریہ ادا کیا۔انہوں نے اس عزم کا اعادہ کیا کہ پاکستان اس مشکل وقت میں فلسطین کے عوام کے ساتھ کھڑا ہے اور ان کی ضروریات کو پورا کرنے کی ہر ممکن کوشش کرے گا۔فلسطینی سفیر نے امداد کی فراہمی پر پاکستانی عوام کا شکریہ ادا کیا۔