جموں وکشمیر پر بھارتی قبضے کیخلاف نیو یارک میں کشمیریوں کا احتج اج

جموں وکشمیر پر بھارتی قبضے کے خاتمے اور تمام سیاسی قیدیوں کی رہائی کا مطالبہ

پیر 4 اگست 2025 17:06

نیویارک(اُردو پوائنٹ اخبارتازہ ترین - این این آئی۔ 04 اگست2025ء) جموں و کشمیر پر بھارت کے غیرقانونی قبضے اورنوآبادیاتی منصوبوں کے خلاف امریکہ میں مقیم کشمیریوں نے خواتین اور بچوں سمیت اپنے دوستوں کے ساتھ مل کر نیویارک کے ٹائمز اسکوائر پر ایک پرامن احتجاجی مظاہرہ کیا ۔کشمیرمیڈیاسروس کے مطابق نیویارک میںکشمیری امریکن کمیونٹی کے زیر اہتمام احتجاجی مظاہرے کے شرکاء نے پلے کارڈز اٹھا رکھے تھے جن پر کشمیریوں کے حق خودارادیت کی حمایت کے ساتھ ساتھ جموں وکشمیر پر بھارتی قبضے کے خاتمے اور تمام سیاسی قیدیوں کی رہائی کا مطالبہ کیاگیا۔

ورلڈ فورم فار پیس اینڈ جسٹس کے چیئرمین ڈاکٹر غلام نبی فائی نے بھارت کی جانب سے دفعہ370اور 35Aکی منسوخی کی مذمت کرتے ہوئے اسے جارحانہ اقدام اور اقوام متحدہ کی سلامتی کونسل کی قراردادوں 91اور 122کی خلاف ورزی قرار دیا۔

(جاری ہے)

ڈاکٹر فائی نے بھارت کی طرف سے محمد یاسین ملک، مسرت عالم بٹ اور آسیہ اندرابی جیسے حریت رہنمائوں کی نظربندی کو اختلاف رائے کو دبانے کی کوشش قراردیا۔

مقررین نے جن میں جے کے ایل ایف کے راجہ مختار ،کشمیر مشن امریکہ کے سردار تاج خان، ریٹائرڈمیجر عارف نوید، چودھری مقبول احمد گجر(آزاد کشمیر اسمبلی)اور ایڈووکیٹ امتیاز خان شامل تھے ، مقبوضہ علاقے میں آبادی کے تناسب میں تبدیلیوں، انسانی حقوق کی خلاف ورزیوں اور آزادی صحافت پر پابندیوں کو اجاگرکیا۔ سماجی کارکن صفورا وسیم نے بھارتی جمہوریت کو فریب قرار دیا جبکہ انسانی حقوق کے کارکنوں سردار ساجد سوار اور عطاالظفر نے عالمی برادری پر زوردیا کہ وہ کشمیر یوںکی آواز سنیں۔

کشمیری امریکن الائنس کے صغیر خان ،پاکستان یو ایس اے فریڈم فورم کے شاہد کامریڈ ، فیض خالد قریشی اور آمنہ حبیب سمیت دیگر مقررین نے مقبوضہ جموں وکشمیر میں جاری ظلم وبربریت پر عالمی توجہ اور تمام کشمیری سیاسی قیدیوں کی غیر مشروط رہائی کا مطالبہ کیا۔