ضلع باغ کی پانچوں تحصیلوں کی چھوٹے بڑے مراکز میں یوم استحصال کادن منایا گیا

باغ(اُردو پوائنٹ اخبارتازہ ترین - این این آئی۔ 05 اگست2025ء)باغ کی پانچوں تحصیلوں کی چھوٹے بڑے مراکز میں یوم استحصال کادن منایا گیا ۔یوم استحصال کے موقع پرنکالی گئی احتجاجی ریلی میں عوام کا سمندر امڈ آیا، ہر طرف سیاہ پرچم اور بھارت کے خلاف درج نعروں سے مزین بینرز نظر آئے، ڈپٹی کمشنر احاطہ سے شروع ہونے والی احتجاجی ریلی میں شرکا کے ہم کیا چاہتے آزادی، گو انڈیا گو بیک، چھین کے لیں گے آزادی، ہندوستان مردہ باد، پاک فوج زندہ باد کے نعروں سے فضا گونج اٹھی،ضلعی انتظامیہ،بلدیاتی نمائندگان،ملازمین تنظیمیں، مہاجرین جموں کشمیر، سیاسی جماعتوں کے نمائندگان،وکلا، صحافی، طلبا، تاجران، شہریان، سول سوسائٹی کے نمائندگان کی بھر پور شرکت، احتجاجی ریلی سے قبل احاطہ ڈپٹی کمشنر آفس میں ایک احتجاجی پروگرام بھی منعقد ہوا جس سے ڈپٹی کمشنر راجہ صداقت، میئر کارپوریشن سردار عبدالقیوم بیگ، چیئرمین علمائے مشائخ کونسل مولانا امتیاز صدیقی، سردار عبدالرشید چغتائی ایڈووکیٹ، سردار طارق مسعود ایڈووکیٹ،ایکسین برقیات قاضی خالد، مفتی ادریس چغتائی،چوہدری عبدالواحد، لطیف لون، ارشاد بٹ، انعام عزیز، راجہ عبدالحفیظ سمیت دیگر نے خطاب کیا۔

(جاری ہے)

مقررین نے کہا کہ 05اگست 2019کو بھارت نے آرٹیکل 370اور 35Aختم کر کے اقوام متحدہ کی قرار دادوں کی خلاف ورزی کی ہے جس پر اقوام متحدہ اور عالمی دنیا کی مجرمانہ خاموشی لمحہ فکریہ ہے، کشمیری نہ تو ہندوستان کے اس اقدام کو مانتے ہیں اور نہ ہی اس اقدام کے بعد کی غیر آئینی اور غیر قانونی کاروائیوں کو مانتے ہیں کشمیری آزادی سے کم کسی قیمت پر راضی نہیں ہونگے ہندوستان جو چاہے کر لے آخری کشمیری تک جد و جہد آزادی جاری رہے گی، انہوں نے کہا کہ ہندوستان مقبوضہ کشمیر کے اندر نہتے کشمیریوں پر سات لاکھ فوج کے ذریعے جد و جہد آزادی کو دبانے کی کوشش کر رہا ہے جو انکی بھول ہے تحریکیں بندوق اور بم کے زور پر نہیں دبائی جاتیں بلکہ مزید ابھر کر سامنے آتی ہیں، مقررین نے عالمی دنیا بالخصوص اقوام متحدہ اور عالمی انسانی حقوق کے اداروں سے مطالبہ کیا کہ پانچ اگست کے اقدام کو واپس لینے کے لیے بھارت کو مجبور کیا جائے اور کشمیر کی تمام اکائیوں کا جمع کر کے کشمیریوں کو استصواب رائے کا حق دیا جائے تا کہ کشمیری اپنے مستقبل کا فیصلہ کر سکیں۔

پروگرام کے اختتام پر شہدائے کشمیر، کشمیر کی آزادی اور شہدائے پاک فوج کے لیے خصوصی دعا بھی کی گئی۔