الیکشن کمیشن نے شبلی فراز و عمر ایوب سمیت 9 ارکانِ پارلیمنٹ کو نا اہل قرار دیدیا

اس حوالے سے نوٹیفکیشن بھی جاری کردیا گیا اور مذکورہ اراکین کی نشستیں خالی قرار دے دی گئیں

ساجد علی منگل 5 اگست 2025 16:41

الیکشن کمیشن نے شبلی فراز و عمر ایوب سمیت 9 ارکانِ پارلیمنٹ کو نا اہل ..

اسلام آباد ( اُردو پوائنٹ اخبارتازہ ترین۔ 05 اگست 2025ء ) الیکشن کمیشن آف پاکستان نے پی ٹی آئی رہنماؤں سینیٹر شبلی فراز اور عمر ایوب کو نا اہل کردیا۔ تفصیلات کے مطابق الیکشن کمیشن کی جانب سے سینیٹ کے اپوزیشن لیڈر سینیٹر شبلی فراز اور قائد حزب اختلاف قومی اسمبلی عمر ایوب سمیت پاکستان تحریک انصاف سے تعلق رکھنے والے 9 ارکانِ پارلیمنٹ کو نا اہل قرار دے دیا گیا، الیکشن کمیشن نے سینیٹ اور قومی اسمبلی کے اپوزیشن لیڈرز سمیت پی ٹی آئی کے سزا پانے والے ارکانِ قومی و صوبائی اسمبلی کو نااہل قرار دیا۔

بتایا گیا ہے کہ ای سی پی نے جن ارکان پارلیمنٹ کو ناہل قرار دیا ان میں سینیٹر شبلی فراز، قومی اسمبلی کے ارکان عمر ایوب، صاحبزادہ حامد رضا، زرتاج گل، رائے حیدر علی خان، رائے حسن نواز اور اراکینِ پنجاب اسمبلی جنید افضل ساہی، رائے مرتضی اقبال اور محمد انصر اقبال شامل ہیں، الیکشن کمیشن نے اس حوالے سے نوٹیفکیشن بھی جاری کردیا جس کے تحت مذکورہ اراکین کی نشستیں خالی قرار دے دی گئیں۔

(جاری ہے)

یاد رہے کہ چند روز قبل فیصل آباد کی انسداد دہشت گردی عدالت نے آئی ایس آئی آفس حملہ کیس میں مجموعی طور پر 185 میں سے 108 ملزمان کو سزا سنائی، جس کے تحت اپوزیشن لیڈر قومی اسمبلی عمر ایوب، قائد حزب اختلاف سینیٹ شبلی فراز اور پی ٹی آئی پارلیمانی لیڈر زرتاج گل کو نو مئی کے مقدمہ میں 10 سال قید کی سزا سنائی گئی، عدالت نے رکن قومی اسمبلی ایم این اے صاحبزادہ حامد رضا کو بھی 10سال قید کی سزا سنائی۔

اس کے علاوہ فیصل آباد کی انسداد دہشت گردی عدالت کی جانب سے ایم پی اے جنید افضل ساہی کو 3 سال قید کی سزا سنائی گئی، عدالت نے چیچہ وطنی سے ایم این اے رائے حسن نواز اور ایم پی اے رائے مرتضی اقبال کو بھی سزائیں سنائیں جب کہ فواد چوہدری، زین قریشی اور خیال کاسترو کو ان مقدمات سے بری کردیا گیا اورعدالت نے قرار دیا کہ تینوں رہنماؤں کے خلاف شواہد ناکافی تھے جس کی وجہ سے انہیں شک کا فائدہ دیا گیا۔