سمجھوتہ نہیں کریں گے چاہے بھاری قیمت چُکانی پڑے، مودی کا امریکی ٹیرف پر ردعمل

بھارتی وزیراعظم کا یہ بیان صدر ٹرمپ کی جانب سے 50 فیصد ٹیرف عائد کیے جانے کے بعد سامنے آیا

ساجد علی جمعرات 7 اگست 2025 15:31

سمجھوتہ نہیں کریں گے چاہے بھاری قیمت چُکانی پڑے، مودی کا امریکی ٹیرف ..

نئی دہلی ( اُردو پوائنٹ اخبارتازہ ترین۔ 07 اگست 2025ء ) امریکی ٹیرف پر بھارتی وزیراعظم نریندر مودی کی جانب سے ردعمل سامنے آیا ہے۔ عالمی خبر رساں ایجنسی رائٹرز کے مطابق نئی دہلی میں ایک تقریب سے خطاب کرتے ہوئے نریندر مودی نے کہا کہ ہمارے لیے ہمارے کسانوں کی فلاح و بہبود سب سے مقدّم ہے، بھارت اپنے کسانوں، ڈیری سیکٹر اور ماہی گیروں کی بہتری پر کبھی سمجھوتہ نہیں کرے گا، میں ذاتی طور پر یہ جانتا ہوں کہ مجھے اس کی بھاری قیمت ادا کرنا پڑے گی لیکن ہم سمجھوتہ نہیں کریں گے چاہے بھاری قیمت چُکانی پڑے۔

بتایا گیا ہے کہ بھارتی وزیراعظم کی طرف سے یہ بیان امریکی صدر ڈونلڈ ٹرمپ کی جانب سے انڈیا پر 50 فیصد ٹیرف عائد کیے جانے کے بعد سامنے آیا، اگرچہ مودی نے امریکہ یا ٹیرف کے معاملے پر ناکام ہوئے تجارتی مذاکرات کا تذکرہ تو نہیں کیا تاہم انہوں نے اس تبصرے کے ذریعے بھارت کی پوزیشن واضح کردی ہے کیوں کہ بی بی سی کی رپورٹ میں اندرونی ذرائع کا کہنا ہے کہ صدر ٹرمپ کی ٹیم چاہتی ہے بھارت اپنے ڈیری اور زراعت کے شعبوں کو امریکی کاروبار کے لیے کھول دے لیکن انڈیا کے لیے یہ صرف تجارتی مسئلہ نہیں ہے۔

(جاری ہے)

بتایا جارہا ہے کہ بھارت کا زرعی شعبہ سیاسی طور پر حساس، سماجی طور پر پیچیدہ اور اقتصادی طور پر اہم ہے جہاں 40 فیصد سے زیادہ شہری زراعت پر انحصار کرتے ہیں اور اس صورتحال میں بھاری سبسڈی والی امریکی زرعی مصنوعات کے لیے راستہ کھولنے سے انڈین مارکیٹ میں امریکی مصنوعات کی بھرمار ہوگی جو چھوٹے کسانوں کیلئے بربادی کا باعث بن سکتی ہے، اس لیے امریکہ سے اس معاملے پر کسی بھی قسم کا معاہدہ نا صرف مالی طور پر بھارت کے لیے نقصان دہ ہوگا بلکہ اس سے سیاسی پریشانی بھی پیدا ہوسکتی ہے کیوں کہ اس سے پہلے 2020/21ء کی کسان تحریک سے مودی کو کافی سیاسی نقصان ہوا اور اس تحریک نے حکومت کو متنازعہ زرعی قوانین واپس لینے پر مجبور کردیا تھا۔