حلقہ این اے129 لاہور میں ضمنی انتخاب کیلئے امیدواروں کی عبوری فہرست آویزاں کر دی گئی

جمعرات 7 اگست 2025 17:56

لاہور (اُردو پوائنٹ اخبارتازہ ترین - اے پی پی۔ 07 اگست2025ء) قومی اسمبلی کے حلقہ این اے129 لاہور میں ضمنی انتخاب کے لیے امیدواروں کی عبوری فہرست آویزاں کر دی گئی۔ریٹرننگ آفیسر کے مطابق حلقے سے27 امیدواروں نے کاغذات نامزدگی جمع کروا دیئے ہیں۔مسلم لیگ (ن) کی جانب سے حافظ نعمان اور رانا مشہود علی خان نے اپنے کاغذاتِ نامزدگی جمع کروائے جبکہ پاکستان پیپلز پارٹی نے معروف انقلابی شاعر حبیب جالب کی صاحبزادی طاہرہ جالب کو امیدوار نامزد کیا ہے۔

(جاری ہے)

طاہرہ جالب کے تجویز کنندہ پیپلز پارٹی کے رہنما فیصل میر ہیں۔پی پی پی کے ایک اور امیدوار آصف ناگرہ بھی مقابلے میں ہیں۔سابق وفاقی وزیر حماد اظہر نے بھی انتخاب میں حصہ لینے کیلئے کاغذات جمع کرا دیئے ہیں۔ان کے ساتھ ہی پی ٹی آئی کے میاں اویس انجم بھی امیدوار ہیں۔ریٹرننگ آفیسر کے مطابق کاغذات کی جانچ پڑتال کا عمل8 اگست سے شروع ہوگا۔الیکشن کمیشن آف پاکستان کے جاری کردہ شیڈول کے مطابق این اے 129 میں ضمنی انتخاب18 ستمبر 2025 کو منعقد ہوگا۔یاد رہے کہ یہ نشست سابق گورنر پنجاب میاں محمد اظہر کے انتقال کے بعد خالی ہوئی ہے۔