گرمیوں کی چھٹیوں میں اضافہ بلاجواز ہے، پرائیویٹ سکولز ایسوسی ایشن کا فیصلہ واپس لینے کا مطالبہ

بچوں کوتین ماہ تعلیم سے دور رکھنا ان کے مفاد میں نہیں ہے، چھٹیوں میں توسیع سے میٹرک کی کلاسز بری طرح متاثر ہوں گی؛ آل پاکستان پرائیویٹ سکولز مینجمنٹ ایسوسی ایشن کا مؤقف

ساجد علی جمعہ 8 اگست 2025 10:28

گرمیوں کی چھٹیوں میں اضافہ بلاجواز ہے، پرائیویٹ سکولز ایسوسی ایشن ..

لاہور ( اُردو پوائنٹ اخبارتازہ ترین۔ 08 اگست 2025ء ) آل پاکستان پرائیویٹ سکولز ایسوسی ایشن نے گرمیوں کی تعطیلات میں توسیع کو بلاجواز قرار دیتے ہوئے فیصلہ واپس لینے کا مطالبہ کردیا۔ تفصیلات کے مطابق وزیرتعلیم پنجاب نے سکولوں میں موسم گرما کی تعطیلات میں اضافہ کردیا ہے جس کے بعد سرکاری و نجی سکول 14 اگست کی بجائے اب یکم ستمبر سے کھلیں گے، اس حوالے سے صوبائی وزیرتعلیم پنجاب رانا سکندر حیات نے اپنے ایک سوشل میڈیا پیغام میں سکولوں میں موسم گرما کی تعطیلات میں اضافے کا اعلان کیا اور کہا کہ صوبہ بھر میں نجی و سرکاری سکول یکم ستمبر کو کھلیں گے، اس سے قبل سکولوں میں موسم گرما کی تعطیلات 14 اگست تک کی گئی تھیں جن میں اضافے کا فیصلہ صوبائی حکومت نے پنجاب میں موسمی صورتحال کی وجہ سے کیا۔

(جاری ہے)

Schools In Punjab Will Re open from the 1st of September.
— Rana Sikandar Hayat (@RanaSikandarH) August 7, 2025

تاہم آل پاکستان پرائیویٹ سکولز مینجمنٹ ایسوسی ایشن نے گرمیوں کی چھٹیوں میں 31 اگست تک توسیع کو بلاجواز قرار دے دیا، ایسوسی ایشن نے فیصلہ واپس لینے کا مطالبہ کرتے ہوئے کہا ہے کہ اسلام آباد میں نجی تعلیمی ادارے4 اگست سے کھل چکے ہیں، ملک کے دیگرصوبوں میں بھی تعطیلات کے بعد سکولوں میں تعلیمی سرگرمیوں کا آغاز ہو گیا ہے، بچوں کوتین ماہ تعلیم سے دور رکھنا ان کے مفاد میں نہیں ہے، چھٹیوں میں توسیع سے میٹرک کی کلاسز بری طرح متاثر ہوں گی، اس لیے آل پاکستان پرائیویٹ سکولز ایسوسی ایشن کی جانب سے صوبائی وزیر تعلیم رانا سکندرحیات سے تعطیلات میں توسیع کے فیصلے پر نظرثانی کا مطالبہ کیا گیا ہے۔

دوسری طرف صوبہ سندھ اور بلوچستان میں گرمیوں کی چھٹیاں ختم ہوچکی ہیں اور دونوں صوبوں میں تعلیمی ادارے یکم اگست ست دوبارہ کھل چکے ہیں، جس کے ساتھ ہی سندھ اور بلوچستان میں تدریسی عمل کا آغاز بھی ہوگیا، محکمہ تعلیم سندھ نے 1 جون سے 31 جولائی تک چھٹیوں کا اعلان کیا تھا، چھٹیاں ختم ہونے کے بعد بچے یکم اگست سے واپس سکول آنا شروع ہوئے جب کہ کراچی میں زیادہ تر نجی سکولز 4 اگست سے کھولے گئے۔