ش*محکمہ جنگلات کا پاکستان میں پہلی بار جدید ہائیڈروسیڈنگ ٹیکنالوجی کا آغاز

ؔاس طریقہ کار کی بدولت کم وقت اور محنت میں زیادہ اور دیرپا نتائج حاصل کیے جا سکیں گی: زیر مریم اورنگزیب

جمعہ 8 اگست 2025 21:15

ڑ لاہور (اُردو پوائنٹ اخبارتازہ ترین - آن لائن۔ 08 اگست2025ء) سینئر صوبائی وزیر مریم اورنگزیب نے اپنے بیان میں کہا ہے کہ وزیراعلیٰ پنجاب مریم نواز شریف کے وژن کے مطابق ماحولیاتی بحالی اور شجرکاری کے فروغ کے لیے محکمہ جنگلات نے پاکستان میں پہلی مرتبہ دنیا میں تسلیم شدہ جدید ترین ہائیڈروسیڈنگ ٹیکنالوجی متعارف کروا دی ہے۔ اس جدید طریقہ کار کا مقصد بنجر اور کٹاؤ زدہ زمینوں کو تیزی سے سرسبز و شاداب بنانا، مٹی کے کٹاؤ کی روک تھام اور ماحولیاتی توازن کی بحالی ہے۔

محکمہ جنگلات نے ابتدائی مرحلے میں فاریسٹ پارک جلو لاہور اور تخت پڑی، راولپنڈی میں کئی ایکڑ رقبے پر بیج، کھاد، پانی اور نامیاتی اجزاء پر مشتمل محلول کو خصوصی مشینری کے ذریعے اسپرے کیا۔ اس طریقہ کار کی بدولت کم وقت اور محنت میں زیادہ اور دیرپا نتائج حاصل کیے جا سکیں گے۔

(جاری ہے)

سینئر صوبائی وزیر مریم اورنگزیب نے بتایا کہ ہائیڈروسیڈنگ ٹیکنالوجی بنجر زمینوں، پہاڑی ڈھلوانوں، کٹاؤ زدہ علاقوں، سڑکوں کے کناروں، ہاؤسنگ اسکیموں، اور صحرائی خطوں جیسے تھر، چولستان اور بلوچستان کے لیے نہایت موزوں ہے۔

انہوں نے کہا کہ یہ ٹیکنالوجی پنجاب کو ماحولیاتی بحالی اور زمین کی تزئین میں ملکی قیادت کا کردار ادا کرنے کا موقع فراہم کرے گی۔ مستقبل میں اس منصوبے کو مزید اضلاع میں توسیع دی جائے گی تاکہ بڑے پیمانے پر سبزہ کاری ممکن ہو سکے۔ ہائیڈروسیڈنگ دنیا بھر میں کامیابی سے استعمال ہو رہی ہے۔ امریکہ میں ہائی ویز اور گالف کورسز، چین میں صحرائی بحالی، جبکہ آسٹریلیا، کینیڈا، برطانیہ، اسپین، سعودی عرب اور یو اے ای میں شہری سبزہ کاری اور واٹرشیڈ مینجمنٹ میں یہ ٹیکنالوجی رائج ہے۔

انہوں نے مزیدکہا کہ پانی کی کمی، خصوصی مشینری اور تربیت یافتہ عملے کی قلت، اور پتھریلی یا غیر زرخیز مٹی جیسے چیلنجز کے باوجود یہ منصوبہ ماحولیاتی تبدیلیوں سے نمٹنے اور سبز انقلاب لانے کی ایک مؤثر حکمت عملی ہے۔پنجاب ہائیڈروسیڈنگ کے ذریعے ماحولیاتی بحالی میں نہ صرف پاکستان بلکہ خطے میں ایک مثال قائم کرے گا۔ یہ ٹیکنالوجی آنے والی نسلوں کے لیے سرسبز مستقبل کی ضمانت ہے۔