بھارت نے ایک بھی پاکستانی طیارہ تباہ نہیں کیا، عالمی اعترافات بھارتی جھوٹ کا پول کھولتے ہیں ، وزیر دفاع خواجہ محمد آصف

اسلام آباد (اُردو پوائنٹ اخبارتازہ ترین - اے پی پی۔ 09 اگست2025ء) وزیردفاع خواجہ محمد آصف نے کہا ہے کہ بھارت نے پاکستان کے کسی بھی ایک طیارے کونہ مار گرایا ہے اور نہ ہی تباہ کیا ہے۔عالمی سطح پر بھارتی طیارے گرنے کے اعترافات سامنے آئے، حقیقت عیاں کرنے کیلئے دونوں ممالک کے طیاروں کے موجودہ ذخیرے کی آزادانہ تصدیق کرالیں۔ ہفتہ کو بھارتی فضائیہ کے سربراہ کے بیان پر اپنے ردعمل میں سوشل میڈیا ایکس پر اپنی ایک پوسٹ میں وزیر دفاع خواجہ محمد آصف نے کہا کہ آپریشن سندور کے دوران پاکستانی طیاروں کی مبینہ تباہی کے حوالے سے ہندوستانی فضائیہ کے سربراہ کی جانب سے تاخیر سے کیے گئے دعوے اتنے ہی ناقابل فہم اور غیرموزوں وقت پر ہیں ۔

یہ بھی ستم ظریفی ہے کہ کس طرح سینئر بھارتی فوجی افسران کو بھارتی سیاست دانوں کی سٹریٹجک دور اندیشی کی وجہ سے ہونے والی ناکامی سے بچانے کیلئے استعمال کیا جا رہا ہے۔

(جاری ہے)

انہوں نےکہا کہ تین مہینوں تک ایساکوئی دعویٰ سامنے نہیں آیا جب کہ پاکستان نے اس کے فورا ًبعد بین الاقوامی میڈیا کو تفصیلی تکنیکی بریفنگ دی اور آزاد مبصرین ، عالمی رہنماؤں، سینئر بھارتی سیاستدانوں سے لے کر غیر ملکی انٹیلی جنس کے جائزوں تک کے ذرائع سے رافیل سمیت متعدد بھارتی طیاروں کے نقصان کا بڑے پیمانے پر اعتراف کیا گیا۔

بھارت ایک بھی پاکستانی طیارہ کو مار یا تباہ نہیں کرسکا۔ پاکستان نے بھارت کے 6 جنگی طیارے ، ایس 400 ایئر ڈیفنس بیٹریاں اور بھارت کے بغیر پائلٹ کے طیارے تباہ کر دیے جبکہ متعدد بھارتی ایئربیسز کو نقصان پہنچایا۔ بھارتی افواج کے لائن آف کنٹرول پر ہونے والے نقصانات بھی نسبتا ًزیادہ تھے۔انہوں نے کہا کہ اگر سچائی پر سوال ہے تو دونوں فریق اپنے طیاروں کی انوینٹریوں کو آزادانہ تصدیق کے لیے کھول دیں کیونکہ ہماراگمان ہے کہ اس سے وہ حقیقت سامنے آئے گی جو بھارت چھپانا چاہتا ہے۔

انہوں نے کہا کہ جنگیں جھوٹ سے نہیں بلکہ اخلاقیات، قومی عزم اور پیشہ ورانہ قابلیت سے جیتی جاتی ہیں۔ اندرونی سیاسی مصلحتوں کے لیے تیار کی گئی ایسی مزاحیہ داستانیں جوہری ماحول میں تزویراتی غلط حساب کتاب کے سنگین خطرات کو بڑھاتی ہیں جیسا کہ آپریشن بنیان مرصوص کے دوران ظاہر ہوا۔ انہوں نے کہا کہ پاکستان کی خودمختاری اور علاقائی سالمیت کی ہر خلاف ورزی پر تیز، یقینی اور بھرپور ردعمل دیا جائے گا اور آنے والی کسی بھی کشیدگی کی ذمہ داری مکمل طور پر سٹریٹجک طور پر حقیقت سے نا آشنا رہنمائوں پر عائد ہو گی جو وقتی سیاسی فائدے کے لیے جنوبی ایشیا کے امن کے ساتھ جوا کھیلتے ہیں۔