انڈین ایئرفورس چیف کے بیان نے بھارت کی رہی سہی ساکھ بھی مٹی میں ملا دی، وزیر دفاع

اسلام آباد ( اُردو پوائنٹ اخبارتازہ ترین۔ 10 اگست 2025ء ) وزیر دفاع خواجہ محمد آصف نے کہا ہے کہ بھارتی فضائیہ کے سربراہ کا بیان بھارت میں مودی کی شمشان گھاٹ میں جلی اور راکھ ہوئی سیاست کو زندہ کرنے کی ناکام کوشش ہے، ایسی بھونڈی کوشش نے بھارت کی رہی سہی ساکھ کو بھی مٹی میں ملا دیا۔ اپنے ایک بیان میں انہوں نے کہا کہ تین ماہ کے بعد بھارتی ائیر چیف خواب خرگوش سے جاگ اٹھے اور انہیں خیال آیا کہ انہوں نے پاکستانی طیارے تباہ کیے، ان کا بیان بھارت میں مودی کی شمشان گھاٹ میں جلی اور راکھ ہوئی سیاست کو زندہ کرنے کی ناکام کوشش ہے، مودی وطن میں اور دنیا میں ٹکے ٹوکری ہو چکے ہیں، ایسی بھونڈی کوشش نے بھارت کی رہی سہی ساکھ کو بھی مٹی میں ملا دیا۔

وزیر دفاع کا کہنا تھا کہ آپریشن سندور کے دوران پاکستانی طیاروں کو مبینہ نقصان پہنچانے کے حوالے سے بھارتی فضائیہ کے سربراہ کی جانب سے کیے گئے تاخیری دعوے نا صرف ناقابل فہم ہیں بلکہ وقت کے لحاظ سے بے معنی بھی ہیں، یہ بھی ستم ظریفی ہے کہ کس طرح سینئر بھارتی فوجی افسران کو بھارتی سیاستدانوں کی سٹریٹجک دور اندیشی میں ہونے والی ناکامی کو چھپانے کے لیے بطور چہرہ استعمال کیا جا رہا ہے۔

(جاری ہے)

انہوں نے کہا کہ تین مہینوں تک ایسے کسی دعوے کی آواز نہیں سنائی دی جب کہ پاکستان نے فوری طور پر بین الاقوامی میڈیا کو تفصیلی تکنیکی بریفنگ پیش کی اور آزاد مبصرین نے عالمی رہنماؤں، سینئر بھارتی سیاستدانوں سے لے کر غیر ملکی انٹیلی جنس ذرائع نے رافیل سمیت متعدد بھارتی طیاروں کے نقصان کا بڑے پیمانے پر اعتراف ریکارڈ کروایا، بھارت نے ایک بھی پاکستانی طیارہ تباہ نہیں کیا اور پاکستان نے بھارت کے 6 جیٹ طیارے، ایس 400 ایئر ڈیفنس دفاعی نظام اور بھارتی ڈرون تباہ کر دیئے، متعدد بھارتی ایئربیسز کو فوری طور پر غیر فعال بھی کیا گیا، بھارتی مسلح افواج کے لیے لائن آف کنٹرول پر ہونے والے نقصانات بھی کافی زیادہ تھے۔

خواجہ آصف کہتے ہیں کہ اگر سچ پرکھنا ہے تو دونوں ممالک اپنے طیاروں کی جانچ پڑتال کو آزادانہ تصدیق کے لیے پیش کریں، تاہم ہمیں شبہ ہے کہ اس سے وہ حقیقت سامنے آئے گی جسے بھارت چھپانا چاہتا ہے، جنگیں جھوٹ سے نہیں بلکہ اخلاقی برتری، قومی عزم اور پیشہ ورانہ قابلیت سے جیتی جاتی ہیں، ملکی سیاسی مصلحت کے لیے تیار کیے گئے ایسے مضحکہ خیز بیانیے ایٹمی خطے میں تزویراتی غلط حساب کتاب کے سنگین خطرات کو بڑھاتے ہیں۔

وزیر دفاع نے مزید یہ بھی کہا جیسا کہ آپریشن بنیان المرصوص کے دوران بھی ثابت ہوا کہ پاکستان کی خودمختاری اور علاقائی سالمیت کی ہر خلاف ورزی پر تیز، یقینی اور متناسب ردِ عمل دیا جائے گا اور آنے والی کسی بھی کشیدگی کی ذمہ داری مکمل طور پر سٹریٹجک طور پر بھارتی اندھے رہنماؤں پر عائد ہو گی جو وقتی سیاسی فائدے کے لیے جنوبی ایشیاء کے امن کے ساتھ جوا کھیلتے ہیں۔