ڈپٹی چیئرمین سینیٹکی سابق وزیراعلیٰ پنجاب حمزہ شہباز سے ملاقات، ملکی سیاسی، معاشی اور سکیورٹی امور پر تفصیلی تبادلہ خیال

اتوار 10 اگست 2025 15:40

لاہور (اُردو پوائنٹ اخبارتازہ ترین - اے پی پی۔ 10 اگست2025ء) ڈپٹی چیئرمین سینیٹ سیدال خان نے سابق وزیراعلیٰ پنجاب و رکن قومی اسمبلی حمزہ شہباز سے مرکزی سیکرٹریٹ پاکستان مسلم لیگ (ن) ماڈل ٹاؤن میں ملاقات کی، ملاقات میں ملکی سیاسی، معاشی اور سیکیورٹی امور پر تفصیلی تبادلہ خیال کیا گیا۔ اتوار کو سینیٹ سیکرٹریٹ سے جاری بیان کے مطابق ڈپٹی چیئرمین سینیٹ نے محمد حمزہ شہباز شریف کو اسلام آباد میں اپنے چیمبر کے دورے اور بلوچستان آنے کی دعوت دی۔

انہوں نے کہا کہ وزیراعظم محمد شہباز شریف نے ملکی معاملات کی بہتری کے لیے جس جانفشانی سے کام کیا وہ قابلِ تحسین ہے اور سابق وزیراعلیٰ پنجاب نے بھی اپنے دورِ حکومت میں بہترین حکمت عملی کے ذریعے کئی کامیابیاں حاصل کیں۔

(جاری ہے)

سیدال خان نے امید ظاہر کی کہ حمزہ شہباز بلوچستان کا دورہ کر کے وہاں کے عوامی مسائل اور ترقیاتی امور کا جائزہ لیں گے تاکہ صوبے میں مزید بہتری لائی جا سکے۔

حمزہ شہباز شریف نے ڈپٹی چیئرمین سینیٹ کی دعوت قبول کرتے ہوئے یقین دہانی کرائی کہ وہ نہ صرف بلوچستان کا دورہ کریں گے بلکہ اسلام آباد میں ڈپٹی چیئرمین کے دفتر میں ملاقات کر کے ملکی معاملات پر مزید مشاورت بھی کریں گے۔دونوں رہنماؤں نے پاکستان مسلم لیگ (ن) کی جانب سے معیشت کی بہتری اور ملک کی ترقی کے لیے کیے گئے اقدامات کو سراہا اور اس عزم کا اظہار کیا کہ ملک کی خوشحالی کے لیے مشترکہ کوششیں جاری رکھی جائیں گی۔