وفاقی وصوبائی حکومت کی نااہلی و کرپشن کی وجہ سے شہری 17 سال سے پانی کے بحران کا شکار ہیں، منعم ظفر خان

کراچی(اُردو پوائنٹ اخبارتازہ ترین - این این آئی۔ 10 اگست2025ء) امیر جماعت اسلامی کراچی منعم ظفر خان نے کہا ہے کہ وفاقی وصوبائی حکومت کی نااہلی و کرپشن کی وجہ سے کراچی کے شہری گزشتہ 17 سال سے پانی کے بحران کا شکار ہیں، اس مدت میں ایک قطرہ پانی کا بھی اضافہ نہیں ہوا۔ اورنگی ٹاؤن کے عوام پینے کے صاف پانی سے محروم ہیں، بعض علاقوں میں مہینوں تک پانی نہیں آتا۔

قابض میئر مرتضیٰ وہاب حب کینال منصوبے کے نام پر صرف لیپا پوتی کر رہے ہیں۔اگر اس کینال سے اورنگی اور غربی کو پانی نہ ملا تو اس منصوبے کا کوئی فائدہ نہیں۔ جماعت اسلامی نے شہر میں ایک لاکھ درخت لگانے کا ہدف مقرر کیا ہے۔ عالمی معیار کے مطابق 7 افراد کیلئے ایک درخت ہونا چاہیے جبکہ کراچی میں فی ہزار افراد کیلئے صرف ایک درخت ہے۔

(جاری ہے)

کراچی کا ہر شہری سال میں کم از کم ایک درخت لگانے کا عزم کرے ،ہم درخت بھی لگائیں گے اور حالات و نظام بھی بدلیں گے۔

ان خیالات کا اظہار انہوں نے زیڈ ایم سی پارک، شاہراہ اورنگی میں جماعت اسلامی کے تحت ''آؤ اورنگی سر سبز بنائیں'' شجر کاری مہم کے سلسلے میں منعقدہ تقریب سے خطاب کرتے ہوئے کیا ۔تقریب سے امیرجماعت اسلامی ضلع غربی مولانا مدثر حسین انصاری ،خالد زمان شیخ ودیگر یونین کمیٹی کے چیئرمینوں نے بھی خطاب کیا ۔اس موقع پر ضلعی سیکرٹری عبدالحنان ، سکریٹری اطلاعات زاہد عسکری،نائب امیر ضلع شہبازخالد، جماعت اسلامی کے منتخب یوسی چیئرمینزعطائے ربی، حاشرعمر، نورلاسلام، وائس چیئرمینز کرامت علی، عدنان حسیب،کارکنان ومنتخب کونسلرز اور عوام بھی بڑی تعداد میں موجود تھے۔

دریں اثناء منعم ظفر خان نے منتخب بلدیاتی نمائندوں کے ہمراہ محمد علی جناح پارک یوسی چار میں پودے لگا کر مہم کا باقاعدہ افتتاح کیااور شجرکاری مہم کے سلسلے میں شہریوں کو بڑی تعداد میں پودے بھی تقسیم کیے گئے۔اس موقع پر اہل فلسطین و کشمیر سے اظہار یکجہتی کرتے ہوئے سید علی گیلانی ، یحیٰ السنوار اور اسماعیل ہانیہ کے نام سے منسوب 3پودے بھی لگائے گئے ۔

منعم ظفر خان نے مزیدکہاکہ کراچی کنکریٹ کا جنگل بن چکا ہے، گرین لائن منصوبے کیلئے 17 ہزار اور ریڈ لائن کیلئے 14 ہزار درخت کاٹ دیے گئے۔ گلیشیئر تیزی سے پگھل رہے ہیں، موسمیاتی تبدیلی کے اثرات خطرناک حد تک بڑھ چکے ہیں۔ 2015 کی ہیٹ ویو میں 4 ہزار افراد جاں بحق ہوئے تھے۔ ان حالات میں کراچی کو سرسبز بنانے کا واحد حل بڑے پیمانے پر شجر کاری ہے۔

مولانا مدثر حسین انصاری نے کہاکہ آؤ اورنگی سرسبز بنائیں'' شجر کاری مہم یہ محض درخت لگانے کی تقریب نہیں بلکہ ایک عہد ہے، ایک عزم ہے کہ ہم اپنے شہر اورنگی اور اپنے کراچی کو سرسبز، صاف اور خوشگوار بنانے میں اپنا حصہ ڈالیں گے۔ہم سب جانتے ہیں کہ موسمیاتی تبدیلی ہمارے ملک اور خصوصاً کراچی کے لیے ایک بڑا چیلنج بن چکی ہے۔ گرمی کی شدت بڑھ رہی ہے، بارشوں کا نظام بگڑ رہا ہے، ہیٹ ویوز جانیں لے رہی ہیں۔

ایسے میں شجر کاری صرف ایک ماحولیاتی ضرورت نہیں، بلکہ ایک صدقہ جاریہ ہے۔ نبی کریم ؐنے فرمایا:’’جو مسلمان ایک درخت لگاتا ہے یا کھیتی کرتا ہے، پھر اس سے پرندہ، انسان یا جانور کھاتا ہے تو یہ اس کے لیے صدقہ ہے‘‘۔انہوںنے کہاکہ ہم سب مل کر عہد کریں کہ صرف درخت ہی نہیں لگائیں گے بلکہ اپنے علاقے کے مسائل کے حل کے لیے بھی جدوجہد جاری رکھیں گے۔ ہم اس شہر کو نہ صرف سرسبز بنائیں گے بلکہ صاف، محفوظ اور خوشحال بھی بنائیں گے۔