اقلیتوں نے ملک کی ترقی و خوشحالی کیلئے تمام شعبوں میں نمایاں کردار ادا کیا، شہباز شریف

اسلام آباد (اُردو پوائنٹ اخبارتازہ ترین - این این آئی۔ 12 اگست2025ء) وزیراعظم شہباز شریف نے کہا ہے کہ اقلیتوں نیملک کی ترقی و خوشحالی کیلئے صحت ،تعلیم اور دفاع سمیت تمام شعبوں میں نمایاں کردار ادا کیا ہے، دشمن یادرکھے پانی کی ایک بوند بھی تم پاکستان سے چھین نہیں سکتے، اگر تم نے یہ حرکت کی تو دوبارہ تمہیں وہ سبق سکھائیں گے کہ تم کانوں کو ہاتھ لگائو گے، پاکستان کا تم کبھی بھی بال بیکا نہیں کر سکتے۔

ان خیالات کا اظہار انہوں نے منگل کو نوجوانوں کے عالمی دن کے موقع پر تقریب سے خطاب کرتے ہوئے کیا۔انہوں نے کہا کہ تمام اقلیتوں کو گزشتہ روز منائے گئے اقلیتوں کے قومی دن کی مناسبت سے دل کی اتھاہ گہرائیوں سے مبارکباد پیش کرنا چاہتا ہوں، پاکستان کی ترقی اور خوشحالی کی کنجی قوم کے زندہ ستاروں کے ہاتھ میں ہے۔

(جاری ہے)

انہوں نے کہا کہ 14 اگست کی آمد آمد ہے، پوری قوم کو یوم آزادی کی مبارکباد دیتا ہوں۔

وزیراعظم نے کہا کہ کوئی اندازہ کر سکتا تھا کہ14 اگست 1947ء کو ایک نیا ملک دنیا کے نقشے پر آئے گا، قائداعظم محمد علی جناح ان چند لوگوں میں سے ہیں جنہوں نے تاریخ کا رخ موڑا،دنیا کا نقشہ بدلا ،ایک نئی قوم ایک نیا ملک تخلیق کیا، حضرت قائد اعظم کو اللہ تعالی نے یہ توفیق دی اور 14 اگست1947ء کو پاکستان معرض وجود میں آیا،تحریک پاکستان میں لاکھوں مسلمانوں نے حضرت قائد اعظم کی عظیم لیڈرشپ میں حصہ لیا جس میں نوجوان، انجینئرز، ڈاکٹرز، علماء کرام سمیت ہر طبقہ شامل تھا، ہمارے اقلیتی بھائیوں اور بہنوں نے بھی تحریک پاکستان میں بھرپور حصہ لیا اور ان کا نہ صرف قیام پاکستان میں بڑا کردار ہے بلکہ تعمیر پاکستان میں بھی ان کا نمایاں کردار ہے۔

انہوں نے تعلیم ،صحت اور دفاع پاکستان سمیت تمام شعبوں میں شاندار کردار ادا کیا ہے۔وزیراعظم نے کہا کہ آج ایک نیا پاکستان معرض وجود میں آ چکا ہے،مئی میں پاک فضائیہ نے 4 رافیل جہازوں سمیت بھارت کے 6 جہاز مار گرائے،اس چار دن کی جنگ میں ہمارے دلیر جوانوں نے ان کو وہ سبق سکھایا جو ان کو رہتی دنیا تک یاد رہے گا اور یہ ہماری افواج پاکستان کیوہ سپوت اور جوان ہیں کہ جب وہ میدان جنگ میں نکلے تو ان کی مائوں نے ان کے لیے دعا کی کہ بیٹا جا کے پاکستان کا جھنڈا بلند کرنا، پاکستان کی سرحدوں کی حفاظت کرنا اور جان دے دینا گھر واپس نہ آنا لیکن دشمن کو زیر کر کے آنا۔

انہوں نے کہا کہ آج دشمن پر یہ واضح کر دوں کہ اگر تم ہمارا پانی بند کرنے کی دھمکی دیتے ہو تو یہ بات ذہن میں رکھنا کہ پانی کی ایک بوند بھی تم پاکستان سے چھین نہیں سکتے، اگر تم نے یہ حرکت کی تو دوبارہ تمہیں وہ سبق سکھائیں گے کہ تم کانوں کو ہاتھ لگائو گے، پاکستان کا تم کبھی بھی بال بیکا نہیں کر سکتے۔ انہوں نے کہا کہ اب اس پاکستان کو نوجوانوں نے تعمیر کرنا ہے ،لیپ ٹاپ فار آل سکیم کے تحت بلاسود قسطوں پر لیپ ٹاپ فراہم کئے جائیں گے۔

اسلام آباد، گلگت بلتستان،آزاد کشمیر سمیت پاکستان کے دوسرے علاقوں میں ایک لاکھ لیپ ٹاپ باصلاحیت نوجوانوں کی تعلیمی قابلیت کے بنیاد پر تقسیم کئے جائیں گے، پاکستان کی تعمیرو ترقی کے لیے یہ لیپ ٹاپ صرف اور صرف میرٹ کی بنیاد پر تقسیم کئے جائیں گے، کوئی اس میں سفارش نہیں ہوگی، یہی پالیسی میری پنجاب میں تھی اور یہی پالیسی آج یہاں پر ہے اور انشاء اللہ یہی پالیسی پاکستان کو عظیم بنائے گی،محنت سے انشاء اللہ پاکستان عظیم بنے گا۔شہبازشریف نے کہا کہ بھارت ہم سے پانچ گنا بڑا ملک ہے، اسے اپنی عسکری قوت کے اوپر نازتھا، وہ سب ناز، اس کا غرور 10 مئی کو غرق ہو گیا تھا۔انہوں نے کہا کہ نوجوانوں نے محنت اوراعلی تعلیم حاصل کر کے پاکستان کو عظیم بنانا ہے۔