فیلڈ مارشل سید عاصم منیرسے اول نائب وزیر دفاع اور آذربائیجان کی فوج کے چیف آف جنرل سٹاف کی ملاقات، دوطرفہ تعلقات کو مزید مستحکم کرنے کے عزم کا اعادہ

راولپنڈی (اُردو پوائنٹ اخبارتازہ ترین - اے پی پی۔ 13 اگست2025ء) چیف آف آرمی سٹاف فیلڈ مارشل سید عاصم منیرنے آذربائیجان کے ساتھ پاکستان کے گہرے برادرانہ اور دوطرفہ تعلقات کو مزید مستحکم کرنے کے عزم کا اعادہ کیا ہے۔بدھ کوآئی ایس پی آر سے جاری کردہ بیان کے مطابق چیف آف آرمی سٹاف فیلڈ مارشل سید عاصم منیرسے اول نائب وزیر دفاع اور آذربائیجان کی فوج کے چیف آف جنرل سٹاف کرنل جنرل کریم ولیوف نےجنرل ہیڈ کوارٹرز (جی ایچ کیو) میں ملاقات کی۔

ملاقات میں باہمی دلچسپی کے امور پر تبادلہ خیال کیا گیا، خاص طور پر موجودہ عالمی اور علاقائی سلامتی کے منظرنامے پر توجہ دی گئی۔آرمی چیف نے آذربائیجان کے ساتھ پاکستان کے گہرے برادرانہ تعلقات کا اعادہ کیا اور دوطرفہ تعلقات کو مزید مستحکم کرنے کے عزم کا اعادہ کیا۔

(جاری ہے)

انہوں نے آذربائیجان اور آرمینیا کے درمیان کامیاب امن معاہدے پر معزز مہمان کو بھی مبارکباد دی۔

معزز مہمان نے معرکہ حق، آپریشن بنیان مرصوص میں پاکستان کی مسلح افواج کی پیشہ ورانہ مہارت اور کامیابیوں کی تعریف کی۔ وفد نے یوم آزادی اور جشن فتح کے لئے نیک خواہشات کا اظہار بھی کیا۔فیلدمارشل نے معرکہ حق کے دوران پاکستانی عوام کے ساتھ کھڑے ہونے اور یوم آزادی کی تقریب میں شرکت کے لئے آذربائیجان کے دستے کو بھیجنے پر آذربائیجان کی قیادت اور عوام کا شکریہ ادا کیا۔

دونوں عسکری رہنمائوں نے دفاعی تعاون کو آگے بڑھانے اور علاقائی امن و استحکام کے لیے مشترکہ کوششوں کو فروغ دینے کے مشترکہ عزم کا اظہار کیا۔اس موقع پر کرنل جنرل کریم ولیوف نے آذربائیجان کے صدر الہام علیوف کی جانب سے فیلڈ مارشل عاصم منیرکوپاکستان کے ساتھ فوجی تعاون میں خدمات کے اعتراف میں آذربائیجان کا باوقار محب وطن جنگی تمغہ دیا۔

انہوں نے دہشت گردی کے خلاف جنگ میں پاکستان کی غیر متزلزل کوششوں کو سراہا اور دفاع اور سلامتی میں تعاون بڑھانے کے لیے آذربائیجان کے عزم کا اعادہ کیا۔ معزز مہمان نے پاکستان کی گرمجوشی سے مہمان نوازی اور آذربائیجان کے لیے مستقل حمایت پر شکریہ ادا کیا۔قبل ازیں جی ایچ کیو آمد پر پاک فوج کے چاق و چوبند دستے نے کرنل جنرل کریم ولیوف کو گارڈ آف آنر پیش کیا۔ انہوں نے یادگار شہداء پر پھولوں کی چادر بھی چڑھائی۔