حج 2025 سے متعلق 3267 شکایات موصول ، ازالے کیلئے کثیرسطحی نظام اپنایا گیا، وزارت مذہبی امور

اسلام آباد(اُردو پوائنٹ اخبارتازہ ترین - این این آئی۔ 13 اگست2025ء)وفاقی وزارت مذہبی امور کو حج 2025سے متعلق مجموعی طور پر3267 شکایات موصول ہوئیں ،جن میں 40.5فیصد رہائشوں،22.9فیصدٹرانسپورٹ،21 فیصد کھانے کے معیار،15.5فیصدموبائل کمپنیوں سے متعلق تھیں۔بدھ کو قومی اسمبلی کے اجلاس کے دوران ایم این اے عالیہ کامران کے سوال پر وزارت مذہبی امور کی جانب سے بتایا گیا کہ ان شکایات کو دور کرنے کے لیے، وزارت نے شکایت کے ازالے کا کثیرسطحی نظام اپنایا۔

قومی اسمبلی کو بتایا گیا کہ ٹرانسپورٹ، رہائش اور کیٹرنگ جیسی خدمات کے لیے ٹھیکے کسی بلیک لسٹ یا زیر تفتیش کمپنی کو نہیں دیئے گئے،ایک ذیلی کمیٹی کے ذریعہ حج 2024 کے ریکارڈ کے مطابق تمام فرموں کو پہلے تکنیکی طور پر اہل کیا گیا تھا جس کی وزارت مذہبی امور نے حج 2025 کی باقاعدہ تشہیر کی۔

(جاری ہے)

قومی اسمبلی کو بتایاکہ پاکستان حج مشن کا آڈٹ ہر سال باقاعدگی سے کیا جاتا ہے، آئندہ حج آپریشنز کیلئے سرکاری حج سکیم کو بڑھانے اور فروغ دینے کیلئے وزارت مذہبی اموروبین المذاہب ہم آہنگی نے ایک جامع اور کثیر جہتی حکمت عملی اپنائی ہے۔

حج پیکجز ، دستیاب سہولیات اور درخواست کے طریقہ کار کے بارے میں عوام کو آگاہی وزارت کی آفیشل ویب سائٹ اور اس کے آفیشل فیس بک پیچ کے ذریعے بھی دی جاتی ہے۔ اس سال ، سعودی حکومت کی طرف سے مقرر کردہ آخری تاریخ کو پورا کرنے کیلئے، وزارت نے حجاج کی رجسٹریشن کا کام کچھ پہلے شروع کیا اور وقت پر مکمل کر لیا، اور 31 جولائی 2025 کو وفاقی کابینہ نے حج پالیسی 2026 کی منظوری دے دی ہے۔

قومی اسمبلی کو بتایا گیا کہ صحت کے حوالہ سے حجاج کی معیاری خدمات کو یقینی بنانے کے لیے، وزارت پیپرا کے قواعد وضوابط کے مطابق، شفاف ٹینڈرنگ کے عمل کے ذریعے ادویات اور ویکسین کی خریداری کا آغاز کرے گی۔ حج کے مناسک، رہائش، خوراک اور نقل و حمل کے انتظامات پر حجاج کی رہنمائی کے لیے پاکستان بھر میں تربیتی سیشن منعقد کیے جائیں گے۔ تعلیمی مواد اور معلومات ایک آفیشل اینڈرائیڈ موبائل ایپ کے ذریعے فراہم کی جائیں گی ، اور حج کی ضروری اشیاء (بشمول سفری بیگ ) عازمین کی روانگی سے پہلے تقسیم کی جائیں گی۔

ویکسی نیشن کی سہولیات ملک بھر کے تمام ڈائریکٹوریٹ آف حج میں دستیاب ہوں گی۔ جوابدہی اور خدمات کے معیار کو یقینی بنانے کیلئے، وزارت مذہبی امور اور بین المذاہب ہم آہنگی کے سیکرٹری اور ڈائریکٹر جنرل (حج) دفتر برائے حجاج امور پاکستان (COPAP) کی نگرانی میں ما نیٹرنگ ٹیمیں تعینات کی جاتی ہیں۔ ان ٹیموں کو یہ یقینی بنانے کا کام سونپا گیا ہے کہ تمام خدمات خاص طور پر حجاج کی رہائش گاہوں میں صفائی ، کھانے کی صفائی اور نقل وحمل کے شعبوں میں ،فراہم کرنے والے اپنے معاہدے کی ذمہ داریوں کو پورا کریں۔

کار کردگی کے معیارات پر پورا نہ اترنے والے دکانداروں پر جرمانے عائد کر کے کوالٹی ایشورنس کو مزید تقویتدی جاتی ہے۔قومی اسمبلی کو بتایا گیاکہ وزارت کیٹرنگ کمپنیوں کا ان کی اسناد اور ماضی کی کارکردگی کی سخت جانچ کے بعد انتخاب کرتی ہے تا کہ سروس کے اعلیٰ معیار کویقینی بنایا جا سکے۔ فلاحی عملہ (بشمول معاونین حجاج اور حج میڈیکل مشن کے ارکان ) کا انتخاب میرٹ پر بنی ، مسابقتی عمل کے ذریعے شفافیت اور آپریشن کار کردگی کوبرقرار رکھنے کیلئے منظور شدہ معیار کے مطابق کیا جاتا ہے۔

یہ اقدامات خدمت کی فراہمی کو بہتر بنانے ،ادارہ جاتی احتساب کو مضبوط بنانے اور پاکستانی عازمین کے لیے ایک محفوظ ، آرام دہ اور روحانی طور پر پورا کرنے والے حج کے تجربے کو یقینی بنانے کے لیے وزارت کے جاری عزم کی عکاسی کرتے ہیں۔