پاکستان میں کاروباری اعتماد میں مسلسل اضافہ ، گیلپ سروے کی رپورٹ جاری

بدھ 13 اگست 2025 21:47

اسلام آباد(اُردو پوائنٹ اخبارتازہ ترین - این این آئی۔ 13 اگست2025ء)پاکستان میں کاروباری اعتماد میں مسلسل اضافہ ہونے لگا،گیلپ سروے کی رپورٹ کے مطابق ملکی ترقی اور معاشی استحکام کیلئے ایس آئی ایف سی کی کاوشیں ثمر آور ثابت ہو رہی ہیں۔ رپورٹ کے مطابق پاکستان کی معاشی بحالی اور پر اعتماد کاروباری ماحول میں واضح بہتری ہوئی ہے، چار سال بعد پاکستان تیز ترین مستحکم معاشی بحالی کی جانب گامزن ہے۔

(جاری ہے)

سروے نتائج کے مطابق 61 فیصد افراد نے کاروباری کارکردگی کو ’’اچھی‘‘ یا’’ انتہائی اچھی‘‘ قرار دیا ہے ،جبکہ مستقبل میں بھی کاروباری حالات بہتر ہونے کی توقع کے تحت 61 فیصد افراد نے ترقی کی پیش گوئی برقرار رکھی ہے۔گیلپ سروے کے مطابق گزشتہ سہ ماہی کی نسبت رشوت کی شکایات 34 فیصد سے کم ہو کر 15 فیصد پر آ گئیں، معاشی انتظامات کی منظوری تقریباً دوگنا ہو گئی اور سروے میں شامل 46 فیصد نے موجودہ حکومت کو گزشتہ حکومت سے بہتر قرار دیا،اسی طرح توانائی کی صورتحال گزشتہ سالوں کے مقابلے میں بہتر ہوئی ہے اور 2023 اور 2024 کے مقابلے میں لوڈشیڈنگ میں بھی خاطرخواہ کمی ریکارڈ کی گئی ہے۔