قوم، ملک اور دین کی خاطر اپنے اختلافات بھلا کر سب لوگ پاکستان کے جھنڈے تلے یک جان ہو جائیں‘چودھری پرویزالٰہی

آج ہندوستان کے مسلمانوں سے پوچھیں کہ آزادی کتنی بڑی نعمت ہے، اس آزادی پر ہم اللہ تعالیٰ کا جتنا شکر ادا کریں کم ہے، یہی 14 اگست کا پیغام اور اصل روح ہے‘جشن آزادی پر پیغام

بدھ 13 اگست 2025 21:20

لاہور (اُردو پوائنٹ اخبارتازہ ترین - این این آئی۔ 13 اگست2025ء)پاکستان تحریک انصاف کے مرکزی صدر و سابق وزیراعلیٰ پنجاب چودھری پرویزالٰہی نے اپنے ویڈیو پیغام میں کہا ہے کہ پوری قوم جشن آزادی جوش و جذبے کے ساتھ منا رہی ہے مگر ہمیں یہ ہر گز نہیں بھولنا چاہئے کہ اللہ تعالیٰ نے ملک پاکستان کلمے کی برکت سے نوازا ہے، یہ مملکت لا الہ الا اللہ محمد رسول اللہ کے نظام تلے قائم ہے، سب لوگ اپنے اختلافات بھلا کر قوم، ملک اور دین کی خاطر اس جھنڈے تلے یک جان ہوں۔

چودھری پرویزالٰہی نے کہا کہ آج ہم اپنے شہیدوں کی قربانی کو یاد رکھیں جنہوں نے قیام پاکستان کے موقع پر اپنی جانوں کا نذرانہ پیش کیا، آج ہندوستان کے مسلمانوں سے پوچھیں کہ آزادی کتنی بڑی نعمت ہے، اس آزادی پر ہم اللہ تعالیٰ کا جتنا شکر ادا کریں کم ہے، یہی 14 اگست کا پیغام اور اصل روح ہے۔

(جاری ہے)

چودھری پرویزالٰہی نے کہا کہ اللہ تعالیٰ سے دعا کریں کہ ہر محاذ پر چاہے وہ معیشت کا محاذ ہو، جنگ کا محاذ یا کرپشن کے خلاف محاذ ہو اس پر ہم سب اکٹھے ہو جائیں، اس ملک نے انشاء اللہ بہت آگے بڑھنا ہے اور ترقی کرنی ہے، میں نوجوانوں کو خاص طور پر خراج تحسین پیش کرتا ہوں، ماشاء اللہ نوجوان بڑی سوچ سمجھ رکھنے والے ہیں، مجھے پوری امید ہے کہ انشاء اللہ نوجوان ہی پاکستان کو آگے لے کر جائیں گے، پاکستان زندہ باد، قائداعظم زندہ باد۔