Live Updates

ہم پاکستان کو آزاد ی دلوانے اور اس کی حفاظت کرنے والے محسنوں کو خراج عقیدت پیش کرتے ہیں، ڈاکٹر محمد علی

جمعرات 14 اگست 2025 17:10

لاہور (اُردو پوائنٹ اخبارتازہ ترین - اے پی پی۔ 14 اگست2025ء) وائس چانسلر پنجاب یونیورسٹی پروفیسرڈاکٹر محمد علی نے کہا ہے کہ ہم پاکستان کے 78ویں جشن آزادی پر1947 میں ملک کو آزادکرانے والے اور 10مئی 2025 کو آزادی کی حفاظت کرنے والے محسنوں کو خراج عقید ت پیش کرتے ہیں۔ وہ پنجاب یونیورسٹی کے زیر اہتمام پاکستان کے یوم آزادی کے موقع پر ایڈمن بلاک کے سامنے منعقدہ پرچم کشائی کی تقریب سے خطاب کررہے تھے۔

اس موقع پر پرووائس چانسلر پروفیسر ڈاکٹر خالد محمود، رجسٹرار ڈاکٹر احمد اسلام،فیکلٹیز ڈینز، شعبہ جات کے سربراہان، اساتذہ،افسران، ملازمین، طلبا و طالبات، فیملیزاور بچوں نے بھرپور شرکت کی۔ تقریب میں وائس چانسلر نے پرچم کشائی کی اورکبوتر آزاد کئے۔اپنے خطاب میں پروفیسر ڈاکٹر محمد علی نے کہا کہ آج تجدید عہد کا دن ہے جس میں ہم عہد کرتے ہیں کہ اپنے ملک، قوم اور ایمان کے ساتھ کہ جب تک زندہ ہیں اس وطن کی حفاظت کے لئے کسی بھی طرح کی قربانی سے دریغ نہیں کریں گے۔

(جاری ہے)

انہوں نے کہا کہ ہم اس موقع پر اللہ تعالی کے شکر گزار ہیں کہ اس نے معرکہ حق میں بڑی فتح نصیب کی اور ہم ایک بڑی قوم بن کر سامنے آئے ہیں۔ انہوں نے کہاکہ پاکستان 10 مئی کے بعد بھرپور قوت سے روشن مستقبل کی طرف بڑھ رہا ہے اور متحد ہوکر خوشحالی لائیں گے۔ انہوں نے کہا کہ ہم یہ عہد کرتے ہیں کہ اللہ تعالی نے شرف بخشا تو ملک کی حفاظت کے لئے شہادت کو قبول کریں گے۔ انہوں نے کہا کہ شدید بارش اور خراب موسم میں جشن آزادی کی تقریب میں شرکت کرنے والوں کے جذبات قابل دید ہیں۔ انہوں نے کہا کہ ہمیں پاکستان کی آزادی کے لئے ہر تقریب میں جذبہ حب الوطنی کے ساتھ شرکت کرنی چاہیے۔ انہوں نے کہا کہ ہم ایک زندہ قوم ہیں اور رہیں گے۔