14اگست تجدیدعہد کا دن ،معرکہ حق میں بھارت کو تاریخی شکست ہوئی۔ ڈاکٹر راغب حسین نعیمی

جمعرات 14 اگست 2025 19:10

لاہور (اُردو پوائنٹ اخبارتازہ ترین - اے پی پی۔ 14 اگست2025ء) چیئرمین اسلامی نظریاتی کونسل علامہ ڈاکٹرمحمدراغب حسین نعیمی نے کہاکہ ہے کہ 14اگست کا دن صرف جشن کا دن نہیں، یہ تجدیدِ عہد کا دن ہے کہ پاکستان کے اسلامی تشخص پر آنچ نہیں آنے دینگے۔ یہ ملک کلمہ طیبہ کی بنیاد پر حاصل کیا گیا اوراس کا نظام قرآن و سنت پر مبنی ہونا چاہیے، آج ہمیں اپنی تہذیبی و دینی شناخت کو مضبوط کرنا ہوگا۔

ان خیالات کااظہار انہوں نے جامعہ نعیمیہ میں معرکہ حق ویوم آزادی کی مناسبت سے منعقدہ تقریب سے خطاب کرتے ہوئے کیا۔ انہوں نے کہا کہ مغربی فکری یلغار، لبرلزم اور مادر پدر آزادی کے نام پر جو نظریاتی حملے کیے جا رہے ہیں ان کے مقابلے کے لیے ہمیں شعوری طور پر تیار رہنا ہوگا۔جامعہ نعیمیہ افواجِ پاکستان، رینجرز، پولیس اور تمام سکیورٹی اداروں کو خراجِ تحسین پیش کرتا ہے جو شب و روز وطن کے دفاع میں مصروفِ عمل ہیں۔

(جاری ہے)

معرکہ حق میں بھارت کو تاریخی شکست ہوئی،دنیا پر واضح ہوگیا کہ پاکستان اپنادفاع کرنا جانتاہے۔تقریب میں مولانا غلام نصیرالدین چشتی،مولانا محبوب احمد،مفتی عمران حنفی،مفتی عارف حسین،صاحبزادہ حافظ محمدعبداللہ نعیمی،مولانا غلام مرتضی نقشبندی،مولانا غلام یاسین،مفتی محمدمدنی،قاری محمدامیر قادری،مفتی بلال سلطان،مفتی سلطان صدیقی،مفتی جنید احمد،مولانا محمدسلیم نعیمی سمیت ادارے کی اساتذہ اورطلبہ کی کثیر تعداد نے شرکت کی۔

چیئرمین اسلامی نظریاتی کونسل علامہ ڈاکٹرمحمدراغب حسین نعیمی نے اپنے خطاب میں مزید کہاکہ پاکستان کی دفاعی ونظریاتی سرحدوں کے محافظ صرف افواج پاکستان ہی نہیں بلکہ مدارس، جامعات، علما، اساتذہ اور طلبا بھی ہیں۔ ہم سب کو مل کر اپنے اسلامی تشخص، عقیدہ ختم نبوت، دینی اقدار اور آئینی اسلامی دفعات کا دفاع کرنا ہے اوروطن عزیز کے دفاع کومضبوط سے مضبوط تربنانا ہے،جشنِ آزادی صرف جھنڈیاں لگانے یا آتش بازی کرنے کا دن نہیں، بلکہ یہ تجدیدِ عہد کا دن ہے۔