آج پاکستان اقوام عالم میں سربلند ہے ، وطن عزیز کو عظیم سے عظیم تر بنانے کے عزم کا اعادہ کرتے ہیں ،وزیراعلیٰ پنجاب

جمعرات 14 اگست 2025 21:50

لاہور (اُردو پوائنٹ اخبارتازہ ترین - اے پی پی۔ 14 اگست2025ء) وزیراعلیٰ پنجاب مریم نواز نے کہاہے کہ پاکستان ہمیشہ زندہ آباد-الحمد اللہ رب العالمین!قوم کو 78واں یوم آزادی مبارک ہو-وزیراعلیٰ مریم نواز شریف نے جشن آزادی پراپنے تشکر پیغام میں کہاہے کہ پاکستان جیسی بے مثال سرزمین عطا کرنے پر اللہ کریم کا شکر بجا لاتے ہیں۔ آزادسرزمین میں باوقار زندگی گزرنے کا موقع ملنے پر اللہ کریم کا شکر ادا کرتے ہیں۔

وزیراعلی مریم نواز شریف نے کہاکہ دنیائے اسلام کی پہلی ایٹمی طاقت بننے پر بے حد فخر ہے اور پھر شکر ادا کرتے ہیں۔ معرکہ حق میں کامیابی سے سرفراز ہونے پر اللہ تعالی کا شکرادا کرتے ہیں۔ پاکستان ایک روشن چراغ ہے جس کی لو سے دنیا چمک رہی ہے۔مریم نواز شریف نے کہاکہ پاکستان ہماری آن، بان، شان ہے، پاکستان کے بغیر ہم کچھ بھی نہیں۔

(جاری ہے)

یوم آزادی پر علامہ اقبال، قائد اعظم اور ان کے رفقا کار کو خراج تحسین پیش کرتے ہیں۔

ہم آزادی کا دن مناتے ہوئے لاکھوں شہدا کو کیسے بھول سکتے ہیں۔ وزیراعلی مریم نواز شریف نے کہاکہ یوم آزادی پر ہمیں بحیثیت پاکستانی اپنا احتساب کرنا ہوگا، پاکستان نے ہمیں عزت اور آزادی دی ہم نے ملک کو کیا دیا؟خوشی ہے کہ قوم جاگ رہی ہے، سرحدوں پر جوان جاگ رہے ہیں۔ وزیراعلیٰ مریم نواز شریف نے کہاکہ والدین سے اپیل کرتی ہوں کہ آج کے دن جدوجہد آزادی اور تحفظ آزادی کی داستانیں بچوں کو ضرور سنائیں۔14اگست محض جشن آزادی نہیں بلکہ پاک سرزمین سے وفا کے عہد کی تجدید کا دن ہے۔ انہوں نے کہاکہ اللہ تعالی کے فضل و کرم سے آج پاکستان اقوام عالم میں سربلند ہے اور معاشی بلندیوں کی طرف گامزن ہے۔ آج کے دن وطن عزیز کو عظیم سے عظیم تر بنانے کے عزم کا اعادہ کرتے ہیں۔