برسلز میں پاکستانی سفارتخانہ میں یوم آزادی کی تقریب ،سفیر رحیم حیات قریشی نے پرچم کشائی کی

جمعرات 14 اگست 2025 22:10

برسلز (اُردو پوائنٹ اخبارتازہ ترین - اے پی پی۔ 14 اگست2025ء) برسلز میں پاکستانی سفارتخا نہ میں ایک پروقار تقریب میں پاکستان کایوم آزادی حب الوطنی کے جذ بہ کے ساتھ منایا گیا۔بیلجیئم میں پاکستانی سفارتخانہ کی طرف سے جمعرات کو جاری بیان کے مطابق یورپی یونین، بیلجیئم اور لکسمبرگ میں پاکستان کے سفیر رحیم حیات قریشی نے پرچم کشائی کی، اس موقع پر قومی ترانہ بھی بجایا گیا۔

اس موقع پر صدر مملکت ، وزیرِ اعظم اور نائب وزیرِ اعظم ووزیرِ خارجہ کے پیغامات پڑھ کر سنائے گئے۔ بانیانِ پاکستان کی قربانیوں اور قوم کے عزم و حوصلے کو خراجِ تحسین پیش کیا اور مسلح افواج کو معرکہ حق میں تاریخی کامیابی پر خراجِ تحسین پیش کیا گیا۔سفیر رحیم حیات قریشی نے اپنے خطاب میں کہا کہ آپریشن بنیان المرصوص میں دشمن کے عزائم ناکام بنائے گئے، معرکہ حق کی فتح نے اس سال کے یوم آزادی کو مزید قابل فخر بنا دیا ہے، قوم اللہ تعالیٰ کے فضل سے اس تاریخی کامیابی کو حاصل کرنے پر اپنے بہادر بیٹوں کو سلام پیش کرتی ہے۔

(جاری ہے)

شرکا ءنے تاریخی معرکہ حق میں حالیہ کامیابی پر پاکستان کی مسلح افواج کو بھی سراہتے ہوئے قائد اعظم محمد علی جناح کے وژن سے وابستگی کا اعادہ کیا۔اپنے ریمارکس میں سفیر رحیم حیات قریشی نے پرامن، ترقی پسند اور خوشحال پاکستان کے لیے قائداعظم اور علامہ محمد اقبال کے رہنما اصولوں کا حوالہ دیا۔ انہوں نے مسلح افواج کی بہادری اور پیشہ ورانہ مہارت کو خراج تحسین پیش کرتے ہوئے کہا کہ آپریشن بنیان مرصوص میں بروقت اور فیصلہ کن کارروائی کے ذریعہ انہوں نے دشمن کے عزائم کو ناکام بنایا اور ملک و ملت کا دفاع کیا۔

تقریب میں خصوصی دستاویزی فلم کی نمائش بھی کی گئی اور یوم آزادی کا کیک بھی کاٹا گیا۔ بیلجیئم اور لکسمبرگ میں مقیم پاکستانی کمیونٹی کی بڑی تعداد نے تقریب میں شرکت کی ، بعد ازاں مہمانوں کی روایتی پاکستانی ناشتہ سے تواضع بھی کی گئی۔