اقوام متحدہ میں پاکستان کے مستقل مشن اور نیویارک میں پاکستانی قونصلیٹ جنرل کاپاکستان کی آزادی کی 78ویں سالگرہ کے موقع پر پرچم کشائی کی پروقار تقریب کا انعقاد

نیویارک (اُردو پوائنٹ اخبارتازہ ترین - اے پی پی۔ 15 اگست2025ء) اقوام متحدہ میں پاکستان کے مستقل مشن اور نیویارک میں پاکستان کے قونصلیٹ جنرل نے جمعرات کو پاکستان کی آزادی کی 78ویں سالگرہ کے موقع پر پرچم کشائی کی ایک پروقار تقریب کا انعقاد کیا جس میں قوم کے بانیوں اور اس کے محافظوں کو زبردست خراج عقیدت پیش کیا گیا۔چانسری بلڈنگ میں منعقد ہونے والی اس تقریب میں اقوام متحدہ میں پاکستان کے مستقل نمائندے سفیر عاصم افتخار احمد، قونصل جنرل عامر احمد اتوزئی ، پاکستان کے نائب مستقل نمائندے سفیر عثمان جدون، مشن کے افسران اور عملے کے ساتھ ساتھ قونصلیٹ کے ارکان نے بھی شرکت کی۔

اس موقع پر خطاب کرتے ہوئے سفیر عاصم افتخار نے قائد اعظم محمد علی جناح، علامہ ڈاکٹر محمد اقبال اور تحریک پاکستان کے کارکنوں کو ملک کی جمہوری، آئینی اور سیاسی جدوجہد آزادی میں تاریخی اور متاثر کن کردار ادا کرنے پر زبردست خراج تحسین پیش کیا۔

(جاری ہے)

سفیر عاصم افتخار نے کہا کہ اس سال قوم نے آپریشن بنیان مرصوص میں پاکستان کی جامع فتح کا جشن منایاجس میں مئی میں بھارتی جارحیت کو ناکام بنا دیا۔

انہوں نے کہا کہ یہ نہ صرف ایک فوجی فتح تھی، بلکہ سفارت کاری اور معلومات کے شعبوں میں بھی ایک اہم کامیابی تھی ، ہر سطح پر ایک جامع کامیابی جس نے اپنی سلامتی کو لاحق تمام خطرات کا مقابلہ کرنے کی صلاحیتوں پر قوم کے اعتماد کی تجدید کی ہے۔پاکستانی ایلچی نے ملک کی عسکری قیادت، شہداء اور غازیوں کو دل کی گہرائیوں سے خراج تحسین پیش کیا۔

انہوں نے حق خودارادیت کے اصول پر مبنی ہندوستان کے غیر قانونی طور پر مقبوضہ جموں و کشمیر کے لوگوں کے لیے پاکستان کی غیر متزلزل حمایت کا اعادہ کیا اور تمام مظلوم لوگوں بالخصوص فلسطینیوں کے ساتھ یکجہتی کا اظہار کیا۔انہوں نے امن، استحکام، پائیدار ترقی کے اہداف، انسانی حقوق اور موسمیاتی کارروائی کے لیے ایک مضبوط وکیل کے طور پر پاکستان کے کردار کو پیش کرنے میں اقوام متحدہ میں پاکستان کے مشن کی شراکت کو بھی سراہا۔

انہوں نے زور دیا کہ پاکستان عالمی امن اور سلامتی کے فروغ میں ایک قابل اعتماد شراکت دار ہے۔نیویارک میں پاکستان کے قونصل جنرل عامر احمد اتوزئی نے کہا کہ اس سال یہ جشن معرکہ حق کی حالیہ فتح پر فخر سے جڑا ہوا ہے جس کا تاج آپریشن بنیانِ مرصوص کی کامیابی سے سج گیا ہے۔ انہوں نے کہا کہ یہ لمحات ہمیں یاد دلاتے ہیں کہ پاکستان کا دفاع ایک زندہ حقیقت ہے جو ہر روز ملک کی مسلح افواج اور قانون نافذ کرنے والے اداروں کی ہمت، نظم و ضبط اور قربانیوں سے محفوظ ہے۔

انہوں نے کہا کہ آج ہم اپنے 'شہداء' اور 'غازیوں' کو گہرے احترام اور تشکر کے ساتھ یاد کرتے ہیں۔انہوں نے کہا کہ بیرون ملک خدمات انجام دینے کے دوران، "ہمارا فرض ہے کہ پاکستان کے مفادات کا تحفظ کریں، وقار کے ساتھ اس کی اقدار کی نمائندگی کریں اور اس بات کو یقینی بنائیں کہ ہر عمل خواہ سفارت کاری، انتظامیہ یا خدمات کی فراہمی میں ہو، پیشہ ورانہ مہارت کے اعلیٰ ترین معیارات کی عکاسی کرتا ہے۔اس موقع پر افسران محمد فہیم، محمد راشد اور محمد عمران نے بالترتیب صدر آصف علی زرداری، وزیر اعظم شہباز شریف اور نائب وزیر اعظم/پاکستان کے وزیر خارجہ اسحاق ڈار کے پیغامات پڑھ کر سنائے ۔