Live Updates

پیپلز پارٹی کی حمایت سے حکومت بنی، ہمارے بغیر سسٹم نہیں چل سکتا‘گورنر پنجاب

انتخابات کے بعد پی ٹی آئی سے ملکر حکومت بنانے کی کوشش کی مگر انہوں نے ساتھ نہیں دیا اب پی ٹی آئی نے ساتھ دینے کا اعلان تو کر دیا مگر بے اعتبار جماعت کی وجہ سے یہ مشکل فیصلہ ہے‘ سردار سلیم حیدر خان

منگل 7 اکتوبر 2025 21:15

پیپلز پارٹی کی حمایت سے حکومت بنی، ہمارے بغیر سسٹم نہیں چل سکتا‘گورنر ..

لاہور(اُردو پوائنٹ اخبارتازہ ترین - این این آئی۔ 07 اکتوبر2025ء) گورنرپنجاب سردار سلیم حیدر خان نے کہا ہے کہ پیپلز پارٹی کی حمایت سے حکومت بنی اور ہم نے نظام میں بہتری کے لیے مسلم لیگ (ن)کا ساتھ دیا، اب اگر وہ نمبر پورے بھی کرلے تو پیپلزپارٹی کے بغیر یہ سسٹم نہیں چل سکتا،اگر قربانی کو تسلیم نہیں کیا جائے گا تو قیادت سے دراخوست ہے کہ جیالوں کی امنگوں کے مطابق فیصلہ کریں۔

نجی ٹی وی کے مطابق چرچ آف پاکستان کے زیر اہتمام سیلاب متاثرین میں ریلیف پیکج تقسیم کرنے کی تقریب سے خطاب کرتے ہوئے انہوں نے کہا کہ آج کے دن تک بہت سے علاقے سیلاب میں ڈوبے ہوئے ہیں، اللہ تعالی کی طرف سے مشکل آئی، جس سے ہم سب نے مل کر نکلنا ہے۔انہوں نے کہا کہ آفات ہمارے لیے امتحان ہوتے ہیں، اس میں سیاست کو نہیں لانا چاہے، خود سہولیات مل رہی ہوں تو انسان مشکل والے کے دکھ کو محسوس نہیں کرسکتا۔

(جاری ہے)

ہمیں آپس میں جھگڑا نہیں کرنا چاہیے اور یہ نہیں سمجھنا چاہیے سارا کچھ میں ہوں، اداروں میں خرابیوں کی وجہ سے سروے میرٹ پر نہیں ہوسکے جس کی وجہ سے لوگوں کو تکلیف کا سامنا ہے۔سردار سلیم حیدر خان نے کہا کہ ملکی نظام میں بہتری کے لیے مسلم لیگ (ن)ساتھ دیا اور حکومت میں شامل ہونے کا فیصلہ کیا، اگر قربانی کو تسلیم نہیں کیا جائے گا تو قیادت سے دراخوست ہے کہ جیالوں کی امنگوں کے مطابق فیصلہ کریں۔

انہوںنے کہا کہ پیپلزپارٹی کے کارکن پہلے بھی (ن)لیگ سے اتحاد میں خوش نہیں تھے، انتخابات کے بعد ہم نے پاکستان تحریک انصاف کے ساتھ ملکر حکومت بنانے کی کوشش کی مگر انہوں نے ساتھ نہیں دیا۔اب پی ٹی آئی نے ساتھ دینے کا اعلان تو کر دیا مگر بے اعتبار جماعت کی وجہ سے یہ مشکل فیصلہ ہے۔ انہوںنے کہا کہ اگر مسلم لیگ (ن)نمبر پورے بھی کرلے تو یہ سسٹم پیپلزپارٹی کے بغیر نہیں چل سکتا۔