امیر مقام کا سیلاب سے متاثرہ ضلع بونیر کے مختلف علاقوں کا دورہ،سیلاب سے متاثرہ علاقوں میں نقصانات اور امدادی سرگرمیوں کا جائزہ لیا

متاثرہ علاقوں میں میڈیکل کیمپس قائم کئے گئے ہیں، وفاقی حکومت تمام وسائل فراہم کرے گی، متاثرین کو تنہا نہیں چھوڑا جائے گا، وفاقی وزیر

ہفتہ 16 اگست 2025 18:22

پشاور(اُردو پوائنٹ اخبارتازہ ترین - این این آئی۔ 16 اگست2025ء)وفاقی وزیر برائے امور کشمیر، گلگت بلتستان و سیفران اور صدر پاکستان مسلم لیگ (ن) خیبرپختونخوا انجینئر امیر مقام نے سیلاب سے متاثرہ ضلع بونیر کے مختلف علاقوں کا دورہ کیا اس موقع پر کمشنر مالاکنڈ ڈویژن، ڈپٹی کمشنر بونیر، ضلعی انتظامیہ، ڈی پی او سمیت وفاقی محکموں، پیسکو اور پی ٹی اے سمیت دیگر محکموں کے اعلیٰ حکام بھی موجود تھے۔

وفاقی وزیر انجینئر امیر مقام نے متاثرہ خاندانوں سے ملاقات اور تعزیت کی. انہوں نے سیلاب سے متاثرہ علاقوں میں نقصانات اور امدادی سرگرمیوں کا جائزہ لیا اس موقع پر وفاقی وزیر انجینئر امیر مقام نے کہا کہ وہ وزیراعظم شہبازشریف کی ہدایت پر سیلاب سے متاثرہ علاقوں کا دورہ کر رہے ہیں، وزیراعظم شہباز شریف امدادی سرگرمیوں کی خود نگرانی کر رہے ہیں۔

(جاری ہے)

وفاقی وزیر نے کہا کہ یہ سیاست کا وقت نہیں، پوری قوم متاثرین کے ساتھ ہے۔انہوں نے کہا کہ بونیر میں جاری ریسکیو آپریشن میں انتظامیہ، پاک فوج اور ایف سی کے جوان حصہ لے رہے ہیں، کئی گاؤں مکمل تباہ ہوئے، متعدد لاپتہ افراد کیلئے دعا گو ہیں۔انہوں نے کہا کہ متاثرہ علاقوں میں میڈیکل کیمپس قائم کئے گئے ہیں، وفاقی حکومت تمام وسائل فراہم کرے گی، متاثرین کو تنہا نہیں چھوڑا جائے گا۔ وفاقی وزیر نے کہا کہ 2005 کے زلزلے کے بعد یہ دوسرا بڑا قدرتی سانحہ ہے، بونیر میں عارضی راستوں کی بحالی کیلئے کوششیں جاری ہیں۔انہوں نے کہا کہ وزیراعظم شہباز شریف متاثرہ اضلاع کا جلد دورہ کریں گے۔