خیبر پختونخواہ میں سیلاب سے انسانی جانوں کے ضیاع پر پوری قوم غمزدہ ہے ،خرم نوازگنڈاپور

ہفتہ 16 اگست 2025 23:50

لاہور (اُردو پوائنٹ اخبارتازہ ترین - اے پی پی۔ 16 اگست2025ء) پاکستان عوامی تحریک کے سیکرٹری جنرل خرم نواز گنڈاپور نے حالیہ بارشوں کے نتیجہ میں سیلاب سے ہونے والے جانی و مالی نقصان پر گہرے دکھ اور افسوس کا اظہار کیا ہے ۔ ہفتہ کے روز جاری اپنے ایک تعزیتی بیان میں انہوں نے کہا کہ خیبر پختونخواہ ،آزاد کشمیر،گلگت سمیت ملک کے دیگر علاقوں میں آنے والے سیلاب سے قیمتی انسانی جانوں کے ضیاع اور ہزاروں خاندانوں کے بے گھر ہونے پر پوری قوم غمزدہ ہے۔

انہوں نے وفاقی اور صوبائی حکومتوں سے مطالبہ کیا کہ متاثرہ خاندانوں کی فوری بحالی کیلئے عملی اقدامات کئے جائیں،سیلاب متاثرہ کسانوں اور مزدور طبقے کیلئے خصوصی مالی امدادی پیکج دیا جائے تا کہ وہ دوبارہ اپنے پائوں پر کھڑے ہو سکیں۔

(جاری ہے)

انہوں نے کہاکہ متاثرہ علاقوں کی بحالی اور حفاظتی اقدامات کو مستقل بنیادوں پر ترجیح دی جائے تا کہ ہر سال عوام کو ایسی مشکلات کا سامنا نہ کرنا پڑے۔

خرم نواز گنڈاپور نے متاثرہ علاقوں میں ریسکیو آپریشن کے دوران گرنے والے ہیلی کاپٹر حادثے میں شہید ہونے والے جوانوں کی شہادت پر اظہار افسوس کرتے ہوئے کہا کہ دکھی انسانیت کی خدمت اور متاثرہ خاندانوں کی مدد کے مشن پر مامور جوانوں کی شہاد ت پر دلی صدمہ ہوا۔انہوں نے کہاکہ منہاج ویلفیئر فائونڈیشن نے شیخ الاسلام ڈاکٹر محمد طاہر القادری کی خصوصی ہدایات پر متاثرہ علاقوں میں فوری طور پر امدادی سرگرمیوں کا آغاز کر دیا ہے،منہاج ویلفیئر فائونڈیشن کی ٹیمیں متاثرہ علاقوں میں پہنچ گئی ہیں ،متاثرہ خاندانوں میں خشک راشن،پینے کا صاف پانی اور خیمے تقسیم کئے جا رہے ہیں، منہاج ویلفیئر فائونڈیشن نے عارضی طور پر ریلیف کیمپس بھی قائم کر دیئے ہیں جہاں بے گھر ہونے والے افراد کو پناہ،کھانا اور ابتدائی طبی امداد فراہم کی جا رہی ہے۔

انہوں نے کہاکہ امدادی سرگرمیوں کا سلسلہ اس وقت تک جاری رہے گا جب تک متا ثرین اپنے گھروں کو واپس جا کر معمولات زندگی بحال نہیں کر لیتے۔