ایران،پاکستان کے یومِ آزادی کی مناسبت سے شاندار تقریب، معرکہ حق کی یاد تازہ کی گئی

تقریب کے دوران پاکستان اور ایران کے تجارتی حجم کو 10 ارب ڈالر تک بڑھانے کے عزم کا اظہار کیا گیا

اتوار 17 اگست 2025 18:30

تہران (اُردو پوائنٹ اخبارتازہ ترین - این این آئی۔ 17 اگست2025ء)ایران میں پاکستان کے یومِ آزادی کی مناسبت سے شاندار تقریب کا انعقاد کیا گیا، پاکستان ہاؤس تہران میں منعقدہ تقریب میں یوم آزادی کے ساتھ ساتھ معرکہ حق اور آپریشن بنیان مرصوص کی کامیابی کی یاد بھی تازہ کی گئی۔میڈیا رپورٹ کے مطابق تقریب کا آغاز سبز ہلالی پرچم کی پرچم کشائی سے ہوا، جو پاکستان کے سفیر محمد مدثر ٹیپو نے قومی ترانے کی دھن پر انجام دی۔

(جاری ہے)

اس موقع پر خطاب کرتے ہوئے پاکستانی سفیر نے کہا کہ مسلح افواج ہر حال میں مادرِ وطن کے دفاع کے لیے ہمہ وقت تیار ہیں، معرکہ حق کی کامیابی پاک فوج کی بے مثال صلاحیتوں اور قربانیوں کا منہ بولتا ثبوت ہے۔یومِ آزادی کی تقریب میں ایرانی دارالحکومت میں مقیم پاکستانی کمیونٹی اور سفارتخانے کے افسران کی بڑی تعداد نے شرکت کی۔تقریب کے دوران پاکستان اور ایران کے تجارتی تعلقات کو مزید فروغ دینے کے عزم کا اظہار کیا گیا اور اعلان کیا گیا کہ دونوں ممالک اپنے تجارتی حجم کو 10 ارب ڈالر تک بڑھانے کے لیے کوشاں ہیں۔تقریب میں مظلوم کشمیری اور فلسطینی عوام کے لیے خصوصی دعا بھی کی گئی۔